Prishtinë – Dy deputetet e pakënaqura me koalicionin qeverisës në mes të Lidhjes Demokratike të Kosovës dhe Partisë Demokratike të Kosovës, Vjosa Osmani dhe Alma Lama, sot nuk janë dalluar nëse i takojnë partisë që drejton kryeministrinë, apo janë deputete të ndonjë partie opozitare.
Sikurse gjatë deklarimeve jashtë rendit të ditës, edhe në kohën kur janë bërë pyetjet parlamentare, Osmani e Lama, që mes tjerash, janë edhe mike, në vazhdimësi janë përpjekur t’i sfidojnë ministrat, madje edhe ata që vijnë nga LDK-ja.
Për më tepër, kësaj “sfide” nuk i ka shpëtuar as vet kryeministri i Kosovës, Isa Mustafa.
Përderisa deputetja Osmani e ka “ngushtuar” shefin e tij në parti lidhur me themelimin e Gjykatës Speciale, kolegia e saj, Lama, iu ka “vërsulur” zëvendëskryeministrit dhe ministrit të Kulturës, Kujtim Shala, me interesimin për artefaktet e Kosovës që janë marrë nga serbët dhe që sot ndodhen në Serbi ndërsa nuk po kthehen në Kosovë./TeSheshi/
