Dy të huaj, me status turisti, në dy pika kalimi kufiri, janë kapur me drogë nga autoritetet shqiptare.
Rasti i parë u shënua në Qafë Thanë, ku në pranga ka rënë një 21-vjeçar belg, të cilët iu gjet kanabis.
“Shërbimet e Stacionit të Policisë Kufitare Qafë Thanë, në dalje të Republikës së Shqipërisë, në bazë të analizës së riskut, kanë kaluar për kontroll në vijën e dytë, automjetin tip “BMW” që drejtohej shtetasi belg M. W., 21 vjeç, banues në Belgjikë.
Gjatë kontrollit të ushtruar në automjet, shërbimet e Policisë gjetën dhe sekuestruan në cilësinë e provës materiale një sasi me lëndë të dyshuar narkotike kanabis”, njofton policia.
Ndërsa rasti tjetër u shënua në Kakavijë, ku i arrestuar, po për kanabis, është një shtetas polak, 37-vjeç.
“Gjithashtu, shërbimet e Policisë Kufitare në Kakavijë, si rezultat i shtimit të kontrolleve me qëllim parandalimin dhe goditjen e paligjshmërisë, bazuar në analizën e riskut, në dalje të RSH-së, kanë kaluar për kontroll në vijën e dytë, një motoçikletë që drejtohej nga shtetasi P. W., 37 vjeç, banues në Poloni.
Gjatë kontrollit të ushtruar në motoçikletë, shërbimet e Policisë Kufitare dhe shërbimet e Frontex-it, gjetën një sasi lënde të dyshuar narkotike cannabis sativa”, raporton policia. /tesheshi.com/
