Presidentët e Komisionit Evropian dhe Këshillit Evropian, Ursula von der Leyen dhe Charles Michel, kanë nënshkruar një marrëveshje për ndarjen e Bashkimit Evropian me Mbretërinë e Bashkuar, e cila tani mund të shkojë për ratifikim në Parlamentin Evropian.
“Ne kemi nënshkruar një marrëveshje daljeje të Mbretërisë sw Bashkuar me Charles Michel, duke i hapur rrugën ratifikimit të saj nga Parlamenti Evropian,” shkroi Von der Leyen në një mesazh në Twitter.
Me miratimin e Ursula von der Leyen dhe Charles Michel, teksti tani do t’i dorëzohet Parlamentit Evropian në 29 janar për ratifikim.
Pastaj, të enjten e 30 janarit, diplomatët e vendeve anëtare të BE do të aprovojnë marrëveshjen me shkrim, duke siguruar që Mbretëria e Bashkuar të largohet nga Unioni në një mënyrë të organizuar më 31 janar në mesnatë.
“Gjërat do të ndryshojnë në mënyrë të pashmangshme, por miqësia jonë do të mbetet. Ne po fillojmë një kapitull të ri si partnerë dhe aleatë,” shkroi Michel në një mesazh në Twitter në llogarinë e tij zyrtare.
Negociatori i BE për Brexit, Michel Barnier mori pjesë në nënshkrimin e organizuar herët në mëngjes të premten në selinë e Komisionit Evropian në Bruksel, pak para nisjes për në Tiranë.
Marrëveshja do të dërgohet në Londër për t’u nënshkruar nga Kryeministri Boris Johnson.
Nga 31 janari, kur ndarja zyrtare fillon periudhën e tranzicionit deri në fund të vitit 2020, Mbretëria e Bashkuar do të vazhdojë të zbatojë rregullat e BE-së gjatë kësaj periudhe, por nuk do të marrë pjesë në vendimmarrjen e BE-së. Gjatë kësaj periudhe kalimtare, të dy palët duhet të bien dakord për marrëdhëniet e ardhshme, veçanërisht për një marrëveshje tregtare, megjithëse shumë e konsiderojnë shumë të shkurtër këtë kohë për negociata të tilla. /tesheshi.com/
