Në Beograd, gjatë vizitës së tij atje, kreut të diplomacisë europiane Joseph Borrell i është dashur të merret dhe me paralajmërimet për bojkot zgjedhjesh nga një pjesë e opozitës.
Sekretari i Lëvizjes së Lirë Qytetare(PGS), Nathan Albahari, u tha gazetarëve në Beograd se ai i kishte përcjellë zyrtarit të lartë evropian se “marrëveshja e dhjetorit” nuk u respektua.
“Ne përcollëm mendimin se nuk mund të marrim pjesë në zgjedhje tani. Kemi një shtet të robëruar me media të kapura”. tha Albahari.
Ai shtoi se PSG po i kërkon Parlamentit Evropian dhe BE të ndihmojnë në trajtimin e krizës politike dhe se përfaqësuesit evropianë kanë dëgjuar dhe shqyrtuar gjithçka, por tani për tani ata nuk mund të japin përgjigje.
Ndërsa kreu i Partisë Liberale Demokratike, Cedomir Jovanoviç, duke folur për arsyet se pse partia nuk pranon të bojkotojë, tha se “demokracia nuk mund të kërkohet në procesin zgjedhor” ndërsa ajo është shkelur në çdo segment tjetër të jetës.
Ai shtoi se arsyet e bojkotit ishin “kryesisht të kamufluara nga problemet që ne shohim çdo ditë në jetën tonë” dhe se kushtet e zgjedhjeve janë “pak a shumë të njëjta siç kanë qenë gjithmonë”.
Nga ana tjetër, kryetari i Partisë për Drejtësi dhe Pajtim, Muamer Zukorliç, tha se me kreun e ri të diplomacisë evropiane kishte biseduar për përfaqësimin e pakicave.
“Unë theksova çështjen e pakicave kombëtare në parlament, ku ne kemi një boshllëk prej 30% në numrin e pakicave kombëtare. Kështu që sugjerimi im ishte që të përmirësohen kushtet që pakicat kombëtare të përfaqësohen në mënyrë të duhur”, tha Zukorliç.
Zgjedhjet parlamentare në Serbi, siç janë njoftuar nga Presidenti Vuçiç, do të mbahen më 19 ose 26 prill.
Borrell gjithashtu foli në Beograd me Vuçiçin, kryeministren Ana Brnabiç dhe ministrin e Jashtëm Ivica Daçiç.
Borrell tha se Serbia “ka një perspektivë të qartë evropiane – si gjeografikisht ashtu edhe kulturisht – dhe përmes lidhjeve të forta ekonomike që ka me BE dhe anëtarët e saj.”
Gjatë takimit të tij me Vuçiç, ai tha se politika e jashtme e Serbisë duhet të harmonizohet me politikën e jashtme të BE-së në atë mënyrë që të dy Serbia dhe BE të flasin me një zë.
Vuçiç u përgjigj se Serbia është në një rrugë evropiane pa dyshim, por se ajo do të vazhdojë të bashkëpunojë me Rusinë dhe Kinën. /tesheshi.com/
