Kreu i një prej dy gjysmave të PD-së, asaj zyrtare, Lulzim Basha, dha një shpjegim se pse ai nuk është aktiv në politikën e ditës, sipas perceptimit të shumëkujt, duke thënë se thjesht nuk është i pranishëm në ekran.
“Sa i takon çështjes së aktivitetit, unë jam në një aktivitet të përditshëm. Por ka një keqkuptim, sikur të qenit në televizion është baraz me aktivitet. Jo! Në fakt kur je gjithë kohën në televizion, nuk ke kohë të angazhohesh me njerëzit. ‘Me njerëzit, për njerëzit’, kjo është oferta jonë, ju do të jeni gjyqtarët me votën tuaj në zgjedhjet e ardhshme parlamentare”, u shpreh Basha gjatë një komunikimi në Instagram.
Siç tha ai, PD po përgatitet për një kulturë të re politike si dhe për një program të ri.
“Me një program të mirë, që po përgatitet nga ekspertët më cilësor të Shqipërisë dhe me ndihmë ndërkombëtare, me një ekip të përbërë me zonja dhe zotërinj, të rinj dhe të reja me reputacion në shoqëri që gëzojnë besimin tuaj. Kjo do të jetë oferta jonë, është në dorën tuaj të zgjidhni ofertën më të mirë, Partia Demokratike do të jetë kjo ofertë në zgjedhjet e ardhshme. Me një kulturë të re politike që do të bashkojë të gjithë energjitë pozitive të shoqërisë, do të bëjë të mundur ndryshimin që duam të gjithë”, theksoi basha. /tesheshi.com/
