Nga Bardha Nergjoni
Shumë pranë Parlamentit të Shqipërisë, ndodhet një kioskë e rrallë, e vetmja e këtij lloji në Tiranë. Një kioskë që ka rreth 8 mijë libra të vjetër në shitje. Zakonisht jemi mësuar të shikojmë tregtarë librash të vjetër në rrugë me pak tituj, por një kioskë të tillë rrallë e sheh kaq plot.
Pronari i saj, Halit Alimadhi, është kujdesur që të vendosë tabelën e tërheqjes së kuponit tatimor, edhe pse librat i mbledh pa ndonjë faturë shoqëruese. Aty mund të gjesh lehtë, nga veprat e Enverit e Stalinit, metodika të ndryshme, klasikë botërorë, autorë të njohur e të panjohur, metoda në shërbim të nxënësve dhe studentëve në fusha të ndryshme, të gjitha me një çmim mjaft të arsyeshëm.
Haliti tashmë e ka kthyer në profesion mbledhjen dhe shitjen e librave të vjetër, aq sa ka 20 vjet që me këtë punë mban edhe familjen. Përshtypja e tij: të rinjtë nuk e duan më librin; ky biznesi mbahet nga mosha e tretë dhe nostalgjikët; ndërkohëm sa për politikanët që kalojnë pranë kioskës për të shkuar në parlament, aha, ata as që ia hedhin sytë.
Z. Alimadhi si keni arritur deri në grumbullimin e kaq shumë librave në kioskën tuaj?
Kam 20 vjet që merrem me shitjen e librave të vjetër. Më lindi si ide rastësisht por më pas u kthye në një punë me të cilën mbaj familjen. Librat i mbledh kudo, madje edhë në koshat e mbeturinave. Janë libra që vijnë nga bibliotekat e shumë familjeve në Tiranë. Të rinjtë nuk i duan më librat dhe vendosin të zbrazin bibliotekat. Shumë familje ikin në emigracion e mi sjellin mua librat e tyre. Ka të tjerë që bëjnë punime në shtëpi, transferohen apo edhe duan të lirojnë hapësira. Kështu kam arritur ti mbledh rreth 8 mijë libra.
Çfarë lloj librash keni dhe çfarë ju kërkojnë?
Kam mbledhur një shumëllojshmëri librash. Këtu janë mbi 3 mijë tituj të klasikëve, të autorëve shqiptarë, metodika të ndryshme shkollore, metodika të vjetra ruse, fjalorë, studime historike etj. Kryesisht më kërkojnë klasikët dhe autorë të vjetër shqiptarë. Ka edhe shumë nostalgjikë që duan veprat e Enverit. Kryesisht veprat e Enver Hoxhës m`i kërkojnë kosovarët. Ndërkohë mosha e tretë këtu kërkon vepra të Stalinit apo metodika të vjetra ruse. Ata janë edhe më shumë të interesuar për librat në kioskën time, se po qe për të rinjtë, ata duan vetëm ndonjë metodë apo vepër që i kërkohet në shkollë. E blejnë më lirë tek unë prandaj vijnë e pyesin fillimisht për një titull e nëse unë nuk e kam i drejtohen librarive.
Të çfarë periudhe janë këto libra?
Mund të kemi libra edhe nga viti 1948 e në vazhdim. Nuk kam tituj më të vjetër. Pra janë kryesisht të periudhës së komunizmit. Prandaj thashë që më shumë janë të interesuar nostalgjikët.
Duke qenë se jeni afër parlamentit, ju ka ndodhur të ndalojë ndonjë deputet e t`ju kërkojë ndonjë titull?
(qesh) Jo, jo. Politikanët as që mi hedhin sytë e jo të ndalojnë për të pyetur për ndonjë libër. Po ku lexojnë ata libra. Të rrallë duhet të jenë ata që lexojnë.
A keni frikë se mund ta vjedhin këtë kioskë me kaq shumë libra?
Ta vjedhin?! Jo, as që bëhet fjalë. Po ku vjedh njeri libra në Shqipëri. Kjo ndodhi në fillim të viteve 90-të. Tani nuk ka njeri interes tek libri. Jo, jo nuk vjedh njeri se shqiptarët nuk lexojnë më. /tesheshi.com/
