Iniciatorët e Brexit kanë përmendur prej kohësh afrimin tregtar midis Britanisë së Madhe dhe Shteteve të Bashkuara për të kompensuar prishjen me Bashkimin Evropian, dhe për këtë, Donald Trump, me gjithë përbuzjen e tij për multilateralizmin dhe institucionet evropiane, dukej si një partner i përsosur..
Dhe Londra, e cila do të ndahet me BE në janar, do duhet të flasë me Presidentin e ri të SHBA Joseph Biden, i cili dëshiron të rilidhet me BE dhe nuk ndan “shpirtin kalorës” të atyre që ishin për Brexit.
Biden, një demokrat me origjinë irlandeze dhe katolike, ka paralajmëruar tashmë kryeministrin britanik Boris Johnson për çdo veprimtari që do të kërcënonte paqen në Irlandën e Veriut, të tilla si rivendosja e kufirit fizik midis asaj krahine dhe Irlandës, e cila është anëtare e BE.
Për këtë çështje, një kompromis u arrit me Brukselin edhe para marrëveshjes së arritur së fundmi midis Londrës dhe Brukselit. Vëzhguesit besojnë se kjo është një shenjë e një ndikimi të caktuar të zgjedhjes së Biden-it në Shtetet e Bashkuara.
“Londra e ka kuptuar që mosmarrëveshja mbi kufirin e Irlandës Veriore do të ishte absolutisht toksike për marrëdhëniet SHBA-Britani,” tha Jakob Kirkegaard i degës gjermane të Fondit Marshall të SHBA.
Luftimi i ndryshimeve klimatike
Qeveria konservatore e Johnsonit tani po përqendrohet në tema që janë më në përputhje me politikat e ardhshme të Biden-it, siç është lufta kundër ndryshimit të klimës.
Konferenca e KB për klimën e planifikuar për vitin e ardhshëm në Skoci do të jetë një mundësi për të treguar ambicien e përbashkët të dy partnerëve transatlantikë, tha France Press.
Pas katër vitesh tensioni, Londra dhe Uashingtoni duhet të jenë përsëri “në të njëjtën gjatësi vale” dhe për çështjen e Iranit.
“Në letër, Partia Konservatore britanike është më afër Partisë Demokratike në Shtetet e Bashkuara sesa Partisë Republikane të Donald Trump”, tha Kirkegaard.
Britanikët gjithashtu njoftuan një rritje historike të shpenzimeve ushtarake për, sipas Kierkegaard, të përpiqen të vazhdojnë “të luajnë në ligat e mëdha” si një partner strategjik i Shteteve të Bashkuara, veçanërisht në një epokë tensioni me Kinën. Por presidenti i ardhshëm amerikan mund të tërhiqet më shumë nga forcat e BE-së.
“Brexit i Britanisë po përpiqet të tregojë se gjithçka është në rregull, por Shtetet e Bashkuara nuk kanë pse ta mbajnë atë në mënyrë të rreptë në anën e tyre,” tha Kirkegaard.
Ish-këshilltarët e Obamës
Biden do të ketë pranë tij ish-këshilltarët e Barack Obamës të cilët nuk e kanë harruar deklaratën e Johnsonit nga 2016, kur ai përmendi se Obama ka “përbuzje të trashëguar për Perandorinë Britanike”. Johnson aludoi në rrënjët e Obamës në Kenia dhe fjalia e tij ndikoi në qëndrimin e së djathtës ekstreme amerikane.
Presidenti i ri i Shteteve të Bashkuara, i cili do të betohet në 20 janar, nuk heziton të përmend origjinën e tij irlandeze, e kjo sikur dëshiron të distancohet nga Britania e Madhe.
Në një video që qarkullon në mediat sociale, Biden iu përgjigj një reporteri të BBC-së i cili u përpoq t’i bënte një pyetje pas zgjedhjeve: “BBC? Unë jam irlandez! ” pas së cilës ai i dha një buzëqeshje miqësore.
“Eshtë e qartë se ka një ndjenjë në rrethin e Biden-it se Brexit ishte një zgjedhje krejtësisht e gabuar dhe se kryeministri Johnson ishte shumë afër Trump. Pra, ata mendojnë se marrëdhënia me Londrën duhet të vendoset në plan të dytë”, tha një ekspert tjetër, Eric Brattberg nga Qendra Kërkimore Carnegie për Paqen Ndërkombëtare.
Eksperti shtoi se Biden është i vetëdijshëm për rëndësinë e “marrëdhënieve speciale” me Londrën dhe nuk do të rrezikojë lidhjet me atë aleat të pashmangshëm, siç bëri Trump me aleatët evropianë, veçanërisht me Gjermaninë dhe kancelaren Angela Merkel.
“Trump para së gjithash donte të mbillte përçarje në Evropë, Biden dëshiron të jetë ai që shëron këto dëme,” shtoi Brattberg. /tesheshi.com/
