Presidenti Thaçi tha se që nga e hëna nis konsultimet për një qeveri të re, e kjo pas rrëzimit të asaj 50-ditëshes së Albin Kurtit me mocionmosbesimi.
“Pas krijimit të situatës së re, nga e hëna, duke respektuar Kushtetutën dhe ligjet e Kosovës në tërësi dhe përpikmëri, do të filloj konsultimet me liderët e partive politike, gjithashtu edhe me prezantimin e kritereve mbizotëruese për mundësinë e formimit të qeverisë së re dhe mundësi të reja”, tha Thaçi pas inspektimit të Qendrës Studentore të Prishtinës shndërruar në karantinë, për t’u njohur me situatën dhe masat e mara në luftë ne coronavirusin.
“Fokusi im është të shkojmë drejt një qeverie të stabilitetit, unitetit dhe gjithëpërfshirjes në mënyrë që të kemi sukses në reformat tona të nevojshme dhe të domosdoshme”, tha Thaçi, duke shtuar se ai kërkon të shmangë zgjedhje të tjera të parakohshme.
“Fokusi im do të jetë në çdo rrethanë të eliminohet mundësia e organizimit të zgjedhjeve të reja apo shpërbërja e Kuvendit”, theksoi kreu i qeverisë së Kosovës.
Sa i përket asaj çfarë pa në terren në lidhje me frontin anti-Corona, Thaçi tha:
“Më vjen mirë që shoh të gjitha kapacitetet e shtetit të Kosovës që janë vënë në shërbim të përballjes me koronavirusin. Qendra e Studentëve është kthyer në karantinë për qytetarët e Kosovës të ardhur nga jashtë për të mirën e atyre që kthehen, familjeve të tyre dhe të mirën e shëndetit të tërë shoqërisë”. /tesheshi.com/
