Nga Blendi Gashi
Siç është bërë e ditur tashmë, 28 nëntorin, ditën e Pavarësisë, opozita kosovare ka zgjedhur ta kremtojë duke protestuar. Kështu, sentimentit nacional mbarëkombëtar, ajo ka vendosur t’i japë dhe një dimension politik. Ajo po kundërshton fort Marrëveshjen e gushtit në Bruksel për Asociacionin e Komunave serbe, si dhe Demarkacionit me Malin e Zi. Sipas saj, në Ditën e Flamurit, 200.000 njerëz do dalin të festojnë duke protestuar fuqishëm.
Por mazhoranca nga ana e saj shpreh brengën e saj kur thotë se partitë opozitare po përgatiten për të prishur festën e Flamurit.
Edhe diplomatë të huaj në Prishtinë tërheqin vërejtjen se Dita e Flamurit duhet të festohet e qetë, pra pa protesta.
“Brigadat e Kuqe” të VV-së në aksion për të prishur festën
Bajram Gecaj, zv.ministër i Administrimit të Pushtetit Lokal ka thënë për portalin tesheshi.com se opozita me në krye me “Brigadat e Kuqe” të ‘Vetëvendosjes’ në Prishtinë po përgatiten për të prishur festën e 28 Nëntorit.
Sipas Gecajt, udhëheqja e Komunës së Prishtinës s’po merret me punët për çka janë votuar nga qytetarët, por po merren më shumë me çështje kombëtare.
“Administrata e Komunës së Prishtinës, si e tërë, ka obligim të na mundësoj të gjithëve ne, qytetarëve të Prishtinës e të Republikës, të festojmë atë ditë me dinjitet e në mënyrën më festive e paqësore të mundshme; e jo të ftoj dhe të ofroi terren për “brigadat e kuqe” ta keqpërdorin edhe atë ditë, të shenjtë për tërë popullin shqiptar, për të ushtruar edhe një herë veprimet e tyre anarkike dhe të jashtëligjshme. Keqpërdorimi dhe shndërrimi në dhunë i kësaj dite do të shënohej në analet e historisë si akti më i shëmtuar i kësaj opozite dhe si një njollë e pashlyeshme për ta”, ka deklaruar Gecaj për tesheshi.com.
Diplomati gjerman: Dita e Flamurit të festohet në paqe dhe siguri
Se më 28 nëntor mund të ketë eskalim të situatës ka paralajmëruar edhe diplomati gjerman, Ernst Reichel i cili ka thënë opozita po shantazhon qytetarët, ndërkaq ka bërë thirrje që Dita e Flamurit të festohet në paqe.
“Populli i Kosovës duhet të festojë Ditën e Flamurit në paqe dhe siguri. Opozita duhet të ndal shantazhet me anë të dhunës ndaj popullit të Kosovës dhe përfaqësuesve të zgjedhur të tyre .Kjo dëmton demokracinë e re të Kosovës dhe imazhin e saj në botë. Opozita duhet të mësojë ta respektojë vullnetin e shumicës të shprehur në zgjedhje. Ende shpresoj se ka zëra të arsyes brenda opozitës. Shpresoj t’i dëgjoj ata”, ka deklaruar Reichel.
Opozita: Në manifestim do të shprehet vullneti i qytetarëve
Patitë opozitare VV, AAK, NISMA u kanë bërë thirrje të gjithë qytetarëve që më 28 nëntor, në mënyrë masive dhe paqësore, të dalin për të kundërshtuar marrëveshjet me Serbinë dhe Malin e Zi.
“Populli i Kosovës nuk mund të heshtë para një qeverie të tillë. Prandaj, subjektet opozitare, më 28 nëntor 2015, në orën 14:00, në sheshin “Zahir Pajaziti” organizojnë manifestim kundër marrëveshjeve me Serbinë, demarkacionit me Malin e Zi dhe kundër Qeverisë së Kosovës. Në këtë manifestim do të shprehet masivisht, vullneti i qytetarëve të Kosovës për një shtet sovran e funksional. Për një shoqëri të barabartë dhe jo të ndarë në baza etnike”, thotë opozita.
Ndryshe, pjesëmarrjen në këtë manifestim e ka konfirmuar edhe deputeti i VV-së Albin Kurti i cili së bashku me dy koletët e tij Albulena Haxhiu e Faton Topalli janë duke u kërkuar nga policia pasi gjykata ka lëshuar fletëarrest ndaj tyre.
Paraqitja eventuale e Kurtit, Haxhiut e Topallit në manifestim mund të vë në aksion policinë për arrestimin e tyre.
Në një rast të tillë, nuk përjashtohet mundësia që manifestimi paqësor të prishet dhe të ketë reagim nga protestuesit dhe eskalim të situatës. /tesheshi.com/
