Kryeministri i Irakut ka bërë disa deklarata kundërthënëse me ato të javës së kaluar, duke thënë se kërkesa për shpërbërjen e qeverisë është e drejtë dhe e ligjshme, por se në rrethana të dorëheqjes, situata vetëm sa do të tensionohej.
Pas një takimi të ministrave në kryeqytetin Bagdad, Adel Abdul-Mahdi tha se shpërbërja e qeverisë së tij nuk do të jetë e mundur, dhe se për momentin nuk ka “alternative të shpejtë dhe fleksibile”.
Javën e kaluar, Abdul-Mahdi deklaruaroi se ai mund të largohej dhe do të marrë në konsideratë këtë kërkesë të protestuesve. Nisur nga ky fakt, deklarata e mbrëmshme po shihet si “ndërrim politikash”.
“Dorëheqja e qeverisë mund të çojë në thellimin e mëtutjeshëm të problemeve në vend. Për shkak të autoritetit të kufizuar, qeveria e përkohshme nuk mund të aprovojë buxhetin dhe të realizojë reformat e kërkuara”, tha kryeministri.
Sidoqoftë, ai shtoi se ishte gati të linte postin e tij nëse partitë politike bien dakord për zëvendësimin e tij.
Autoritetet irakiane raportuan se ndërprenë qasjen në internet në të gjithë Bagdadin pasi vala e fundit e protestave rezultoi në shumë viktima. Forcat e sigurisë qëlluan të paktën 13 protestues në 24 orët e kaluara, si përpjekje për të shtypur demonstratat kundër partive politike që kontrollojnë qeverinë.
Më shumë se 260 irakianë u vranë në demonstratat që nga fillimi i tetorit kundër një qeverie që ata e shohin si të korruptuar, dhe që kujdeset për interesat e huaja, mbi të gjitha të Iranit. /tesheshi.com/
