Delegacioni i Kosovës dhe i Serbisë, me ndërmjetësimin e Bashkimit Evropian, kanë arritur pajtimin që marrëveshja për njohjen reciproke të diplomave të fillojë zbatimin më 1 mars 2016.
Ministrja për Dialog Edita Tahiri, njëherësh kryenegociatore në dialogun e Brukselit, ka theksuar se kjo është një marrëveshje e re për diplomat, e cila është më e zgjeruar se ajo e vitit 2011, pasi përfshin njohjen reciproke të diplomave të të gjitha niveleve të shkollimit, prej shkollës fillore, deri te arsimi i lartë universitar si dhe nivelet profesionale.
Me këtë marrëveshje Kosova dhe Serbia janë pajtuar që të njohin reciprokisht këto diploma: diplomat e shkollës fillore, të mesme, shkollimit vokacional, nivelin e pestë të kualifikimeve sipas kornizës së kualifikimeve evropiane (EQF), diplomat bachelor, master dhe doktoraturat.
“Njohja reciproke e diplomave bëhet përmes procesit të certifikimit ndërkombëtar të diplomave nga një palë e tretë edhe në këtë rast këtë certifikim do të bëjë Asociacioni i Universiteteve Evropiane dhe pastaj diplomat e certifikuara konsiderohen të njohura nga të dyja shtetet”,- thuhet në njoftim.
Më tej vijohet se “për njohjen e diplomave të shkollës fillore, të mesme dhe ato profesionale (që është risi në këtë marrëveshje) do të përzgjidhet një organizatë ndërkombëtare, e cila do të bëjë certifikimin ndërkombëtar”.
Sipas njoftimit të fundit, kandidatët e interesuar për njohjen e diplomave do të aplikojnë pranë zyrave të organizatës SPARK në të dyja shtetet për të paraqitur aplikacionin për njohje e diplomave, cila më pas do të realizojë procesin e certifikimit ndërkombëtar./tesheshi.com/
