Tragjeditë e refugjatëve që përpiqen të kalojnë Egjeun për të mbërritur në Greqi nuk kanë të sosur. Fatkeqësia e fundit ka ndodhur në orët e para të së mërkurës.
11 trupa janë nxjerrë nga deti në verilindje të ishullit të Farmakonisit. Barka prej druri me të cilën lundronin ata besohet se mbante në të 50 refugjatë, për t’u përmbysur më pas edhe pse kushtet atmosferike ishin të mira. Pesë prej të mbyturve janë fëmijë, katër janë meshkuj e dy janë femra.
Në ujrat ku ndodhi indidenti kanë mbërritur forcat e Frontex-it, dhe operacionet e shpëtimit vazhdojnë. 26 janë personat e shpëtuar, ndërsa po kërkohen dhe 13 të tjerë.
Kërkimet po kryhen nga një helikopter dhe një anije ushtarako-detare, kurse nuk dihet ende kombësia e refugjatëve.
Kjo është ngjarja e fundit tragjike në një seri të tillash, ku të ikur përgjithësisht nga Siria shfrytëzojnë afërsinë e brigjeve turke me ato greke për të kaluar nga njëra anë në tjetrën. Këto udhëtime kanë përfunduar dendur në tragjedi. /tesheshi.com/
