Pavarësisht se Hungaria ka mbyllur kufijtë duke vendosur rregulla të ashpra për refugjatët që përpiqen ta kalojnë kufirin ilegalisht, fluksi i njerëzve që përcillen në Serbi nga Maqedonia nuk ka njohur ulje. Sipas zyrtarëve të Kryqit të Kuq në Preshevë, regjistrohen 2 mijë emigrantë në ditë, pjesa më e madhe e të cilëve janë nga Lindja e Mesme.
Vetëm mëngjesin e sotëm kanë hyrë nga Maqedonia 500 persona, të cilët presin të regjistrohen për të kaluar më tej.
Gjithsesi, Ahmet Halimi, zyrtar i Kryqit të Kuq në Preshevë nënvizon se mbyllja e kufirit hungarez ndikon edhe në qendrën e pranimit në këtë qytet.
“Njerëzit janë nisur në rrugë, pa e ditur se ku do të shkojnë, tashmë pengesë është gardhi me tela me gjemba. Të gjithë janë nervozë, kështu që ne jemi të kujdesshëm me ta”, thotë Halimi, duke shtuar se “ka edhe persona nuk kanë asgjë me vete, pasi i kanë humbur në anijet e përmbysura në det.
Asnjë nga refugjatët e regjistruar nuk mbetet në Preshevë, rrugëtimi i tyre vijon në rast se nuk paraqesin kërkesë për azil.
Ai ka theksuar se asnjëri nga refugjatët nuk mbetet në Preshevë, dhe pasi e marrin vërtetimin për regjistrim, u lejohet qëndrimi triditësh në Serbi ose duhet të paraqesin kërkesë për azil.
Situata sa vjen e keqësohet, pasi deri tani refugjatëve iu është siguruar ushqimi, ndërsa qumështi për fëmijë dhurohet nga një donator privat. UNHCR ka dhënë ndihma, por numri i refugjatëve nuk po pakësohet. /tesheshi.com/
