Mbyllja e kufirit mes Hungarisë dhe Serbisë ka lënë me mijëra emigrantë të bllokuar në kufirin hungarez, ndërsa në këtë vend kanë hyrë në fuqi ligje të ashpra që synojnë frenimin e valës së refugjatëve në Europë. Mirëpo, refugjatët tashmë janë duke tentuar një rrugë të re, atë përmes Kroacisë.
Grupi i parë i refugjatëve ka arritur në kufirin e Serbisë me Kroacinë. Ata udhëtuan me autobuzë drejt qytetit të Sidit, duke kërkuar një mënyrë të re për të arritur në Gjermani, që përbën edhe destinacionin final të tyre.
Kroacia ka thënë se nuk do të lejojë kalimin e refugjatëve përmes territorit të saj. Ky qëndrim i shtohet atyre të vendeve të tjera europiane që kanë rikthyer kontrollet në kufij, ndërsa vijon grindja mes shteteve anëtare të BE-së për krizën e refugjatëve. BE nuk arriti të vendosë kuotat e detyrueshme për shtetet anëtare në takimin e fundjavës dhe e ka shtyrë debatin për një samit tjetër në muajin tetor.
Me qindra refugjatë e kaluan natën në qiell të hapur ose në tenda në afërsi të kufirit të Serbisë me Hungarinë. Një pjesë e tyre tashmë i janë drejtuar Kroacisë, ndërsa pritet që edhe kjo e fundit të mbyllë kufijtë. /tesheshi.com/
