Mbyllja e bankave në Greqi ka bërë që qytetarët grekë të mos kenë para cash nëpër duar e “uria” e tyre duket se po plotësohet nga shqiptarët, të cilët janë duke blerë mallra konsumi dhe pasuri të paluajtshme si rrallë më parë. Burime të revistës Monitor thonë se në Kapshticë së fundmi çdo katër-pesë ditë kalon kufirin një shqiptar me traktor, që ose e ka blerë me një çmim fare të lirë, ose ka raste kur individët kanë marrë traktorin në këmbim të pagesës. Apo ka pasur dhe raste të tjera kur punëtorët sezonalë janë paguar me arka me qershi.
Tregtarët pohojnë se blejnë më shumë këto ditë në Greqi, pasi i marrin mallrat me gjysmë cmimi.
Nuk mungojnë as ata që po blejnë pasuri të paluajtshme, pasi shtëpitë në zona të caktuara të Greqisë, madje edhe turistike janë ulur shumë, deri në 10 apo 20 mijë euro.
Blerja e pasurive të paluajtshme në Greqi është vënë në dukje edhe nga mediat ndërkombëtare, pasi italianët, rusët e të tjerë, po nxitojnë të blejnë shtëpi në ishujt apo zonat turistike greke.
Mediat thonë se kërkesa greke për pasuri të paluajtshme ka rënë në 38 për qind, ndërsa nga jashtë është rritur në 60 për qind. /tesheshi/
