Dy prokurorët amerikanë dhe dy europianët e ardhur nga Kroacia dhe Rumania, kanë përfunduar konsultën e cilësuar “finale” për krijimin e “bërthamës” kryesore të Prokurorisë Speciale, SPAK.
Siç mësohet, kjo bërthamë do të përbëhet nga prokurorë të njohur shqiptarë që janë shquar për integritet dhe ndershmëri.
Një burim diplomatik bëri të ditur se disa nga këto emra janë shumë të njohur për publikun shqiptar që kanë dhënë prova të përballjes me “të keqen”, e që e kanë paguar ose janë heqje ose me transferim.
Një pjesë e tyre janë trajnuar edhe në SHBA prej disa vitesh për luftën ndaj korrupsionit të zyrtarëve.
Ndërkaq, grupi bazë i SPAK që përbëhet nga 2-3 veta, “ustallarë” të hetimit, kanë udhëtuar në SHBA për të takuar disa nga shqiptarët që kanë përfunduar shkollën për drejtësi në universitetet prestigjoze amerikane dhe u është kërkuar që të hyjnë në SPAK.
Tashmë gjithçka po shkon drejt përfundimit dhe në fund të janarit pritet që emrat e tyre të shkojnë drejt komisionit të vettingut.
Ligji i ri
Në Komisionin Parlamentar të Ligjeve ka mbërritur një variant i ri i ligjit të ashtuquajtur “Antimafia”, e që në fakt është ligji i sekuestrimit të pasurive të personave të hetuar për krim të organizuar dhe korrupsion.
Risia në këtë draft është se banesat, bizneset dhe llogaritë bankare që mund të zotërojnë zyrtarët e nivelit të lartë si politikanë, gjyqtarë dhe prokurorë mund të vihen nën sekuestro vetëm duke patur një indicie ose dyshim. Kështu, në rast se një media publikon një material për pasuritë e një zyrtari që dyshohet se janë bërë në rrugë të paligjshme, ky material do të përbëjë një indicie që organet përgjegjëse të vënë nën sekuestro këtë pronë dhe më pas të vijohet me hetime të thelluara.
Në nenin 3 të projektligjit janë të detajuara rastet kur një zyrtari mund t’i sekuestrohet pasuria për të cilën ka dyshime se është krijuar në rrugë jo të ligjshme. “Dispozitat e këtij ligji zbatohen për pasuritë e personave që zotërohen plotësisht ose pjesërisht, në mënyrë të drejtpërdrejtë ose jo, siç përcaktohet në pikën 2 të këtij neni mbi të cilët ekziston një dyshim i arsyeshëm, i bazuar në indicie, për: a) pjesëmarrje dhe kryerje të krimeve nga banda e armatosur, organizata kriminale dhe grupi i strukturuar kriminal, të parashikuara nga kreu XI i Kodit Penal; b) pjesëmarrje dhe kryerje e krimeve nga organizata terroriste dhe krimeve për qëllime terroriste, parashikuar nga kreu VII i Kodit Penal”, thuhet në nenin tre të projektligjit.
Të afërmit e zyrtarëve
Nën sekuestro do të vendosen edhe pasuritë e të afërmve të zyrtarëve të lartë, për të cilat mund të ketë një dyshim apo indicie se ato janë bërë nga veprimtari kriminale.
Në nenin 3, pika 2 janë të parashikuar të gjithë personat e afërt me zyrtarët e lartë mbi të cilat do të veprojë ligji anti-mafia. “Personat e afërm (bashkëshorti, fëmijët, të paralindurit, të paslindurit, vëllezërit, motrat, bashkëjetuesi) të subjekteve të pikës 1 të këtij neni për të cilët prezumohet regjistrimi i rremë, përveçse kur provohet e kundërta; b) personave fizikë ose juridikë, për të cilët ka të dhëna të mjaftueshme se pasuritë ose veprimtaritë e tyre zotërohen, pjesërisht ose plotësisht, në mënyrë të drejtpërdrejtë ose të tërthortë, a janë përdorur, kanë lehtësuar apo në një formë kanë ndikuar në kryerjen e veprimtarive të jashtëligjshme nga personat e parashikuar në pikën 1 të këtij neni”, thuhet në projektligj.
Edhe pasuritë e vëna para hyrjes në fuqi të këtij projektligji do të jenë objekt hetimesh nga organet përgjegjëse në vend. Në projektligj është parashikuar qartë se do të sekuestrohen edhe pasuritë e bëra në rrugë të paligjshme edhe para hyrjes në fuqi të projektligjit. Pas pikës 1 të nenit 38, shtohet pika 2 me këtë përmbajtje:
“Për pasuritë e vëna para hyrjes në fuqi të ndryshimeve dhe shtesave të parashikuara nga ky ligj dhe që kanë lidhje me veprat penale të reja që shtohen në nenin 3, pika 1 të tij, zbatohen dispozitat e pikës 4 të po atij neni”, thuhet në nenin 32. /tesheshi.com/
