Mbyllet dosja për deputetin Mark Frroku, i cili u arrestua në muajin mars të këtij viti dhe prej asaj kohe është prapa hekurave.
Prokuroria e Përgjithshme ka formuluar 4 akuza të rënda ndaj parlamentarit të zgjedhur nga mazhoranca dhe njëkohësisht kryetarit të partisë Kristian Demokrate.
Më e rënda është ajo e vrasjes me paramendim dhe sikur vetëm këtë ta marrë parasysh gjykata, Frroku dënohet me më shumë se 25 vjet burg.
Akuzat që rëndojnë ndaj Mark Frrokut janë:
- “Vrasjes me paramendim, e kryer në bashkëpunim”, parashikuar nga nenet 78/1 dhe 25 të Kodit Penal.
Kjo vepër i atribuohet të pandehurit për ngjarjen e ndodhur në vitin 1999 në Belgjikë, kur pas një përleshje ndërmjet të akuzuarit Frroku, në bashkëpunim me disa të tjerë, ka mbetur i vdekur shtetasi shqiptar Aleksandër Kurti.
Në bazë të veprimeve proceduriale hetimore, rezulton se i pandehuri Frroku dhe 3 bashkëpunëtorët e tij kanë vrarë shtetasin Kurti, për shkak të përplasjeve në aktivitetin e paligjshëm të shfrytëzimit të prostitucionit.
- “Refuzimi për deklarimin, mosdeklarimi, fshehja ose deklarimi i rremë i pasurive të personave të zgjedhur dhe nënpunësve publikë”, parashikuar nga neni 257/a/2” i Kodit Penal.
Gjatë të hetimeve të kryera, bazuar në kallëzimin penal të Inspektoratit të Lartë të Deklarimit dhe Kontrollit të Pasurive e Konfliktit të Interesave (ILDKPKI), shtetasi Mark Frroku akuzohet se nuk justifikon me burime të ligjshme pasurinë në vlerë mbi 2 milion dollarë (saktësisht 209.627.218 lekë të reja).
- “Pastrim i produkteve të veprës penale ose veprimtarisë kriminale”, parashikuar nga neni 287 i K.Penal.
Prokuroria thekson në materialin e saj se “Nga hetimet ka rezultuar se shtetasi Mark Frroku është dënuar në vitin 2002 nga autoritetet e Hollandës me 3 vjet burgim, për veprën penale të “trafikimit të lëndëve narkotike”.
Frroku, rezulton se ka krijuar një pasuri prej 209.627.218 lekë(të reja) me burime te panjohura.
- “Ndërtim i paligjshëm” të parashikuar nga neni 199/a/2 i Kodit Penal.
Kjo akuzë është interesante pasi nënkupton sekuestrimin e një hoteli që po ndërtonte Frroku së bashku me Tom Doshin te Rruga e Durrësit, pranë bllokut të ambasadave, ku ka qenë dikur Hotel Pensioni e më pas restorant Napoli.
Sipas akuzës, Mark Frroku ka blerë disa prona të paluajtshme si truall, apartamente, njësi biznesi dhe garazhe nga deputeti Tom Doshi, ku vlera e përgjithshme e kontratës është rreth 740.000.000 (shtatëqind e dyzetëmilion) lekë të reja. /tesheshi.com/
