“MBS”, gati udhëtimi drejt Turqisë

Princi i kurorës i Arabisë Saudite, Mohammed bin Salman do të bëjë një vizitë zyrtare në Turqi të mërkurën më 22 qershor, tha një zyrtar i lartë turk për AFP-në.

Kjo është vizita e parë e “MBS” në Turqi pas atentatit, në tetor 2018 në Stamboll, ndaj gazetarit saudit Jamal Kashoggi, rast që kishte ftohur marrëdhëniet mes dy forcave rivale rajonale, edhe pse të dyja brenda suazave të Islamit historik.

Orari i detajuar i vizitës do të bëhet i ditur “gjatë fundjavës”, sipas të njëjtit burim.

Marrëveshjet pritet të nënshkruhen gjatë vizitës, tha një zyrtar i lartë turk, duke shtuar se Princi i Kurorës “do të shkojë në Ankara”, por destinacioni i tij ende nuk është sqaruar, shtoi ai.

Presidenti turk Rexhep Tajip Erdogan udhëtoi në Arabinë Saudite në fund të prillit, ku u takua dhe me Princin e Kurorës, përpara se të nisej për në Mekë.

Erdogan dhe Princi i Kurorës i Arabisë Saudite “shqyrtuan marrëdhëniet turko-saudite dhe mjetet për zhvillimin e tyre në të gjitha fushat”, njoftoi agjencia saudite e lajmeve SPA pas takimit të tyre.

Pas vitesh fërkime, mes dy poleve të botës islame po hapet një faqe e re marrëdhëniesh dypalëshe.

Ndodh kjo në një kohë me zhvillime delikate në sferën gjeopolitike e gjeostrategjike. Një rend i ri botëror duket se po shpërbëhet, për t’ja lënë vendin një të riu. Dhe kështu, të gjitha fuqitë po bëjnë lëvizjet e tyre shahistike, për një pozitë me të mirë në rikonfigurimin e botës. /tesheshi.com/