Ngjan i pakuptimtë një vendim i gjykatave gjermane për të mos lejuar që në një manifestim të kësaj të diele në Këln kundër puçit ushtarak në Turqi të pranishmëve t’u drejtohet përmes ekranit presidenti turk Rexhep Tajjip Erdogan.
Vendimin më të fundit e ka dhënë Gjykata Kushtetuese e Gjermanisë, duke e bërë të pamundur fjalën e Erdoganit për manifestuesit, përgjithësisht emigrantë turq që jetojnë e punojnë në atë vend.
Manifestimi, i quajtur “Mitingu i demokracisë kundër puçit”, do të zhvillohet këtë mesditë në Këln, dhe në programin e tij ka qenë dhe një fjalim i presidentit turk, që do të përcillej nëpërmjet ekraneve.
Ndërsa policia e Këlnit nuk ka dhënë leje për këtë, duke e përligjur me arsye sigurie, organizatorët e manifestimit e kanë çuar çështjen në gjykatë. Fillimisht ka qenë gjykata lokale që i ka dhënë të drejtë policisë gjermane, për të përfunduar dje te vendimi i prerë i Gjykatës Kushtetuese.
Kryetari i Unionit të Demokratëve Turq Europianë, Zafer Sırakaya, i ka thënë agjencisë turke të lajmeve Anadolu Agency se vendimi është i motivuar politikisht.
“Nga një këndvështrim ligjor, nuk ka pranueshmëri ndaj këtij vendimi. Tejet e qartë se ky është një vendim politik.”
Që prej puçit të dështuar ushtarak të para dy javëve në Turqi, ka një fushatë lehtësisht të spikatshme në mediat ndërkombëtare e me gjerë të denigrimit të figurës së presidentit turk. Në vend të vënies në bankën e të akuzuarve të organizatorëve të puçit, të cilët paraqiten tani në mënyrë absurde si të persekutuar, është zgjedhur nxirrja e veprimtarisë së Rexhep Tajjip Erdoganit.
Vendimi i fundit i gjykatave gjermane duket hapur të jetë në të njëjtën linjë. /tesheshi.com/
