Mbajtja e një raundi të ri bisedimesh me udhëheqësit e partive për t’i dhënë zgjidhje krizës politike pas përpjekjes së dështuar për formimin e një qeverie të re është shtyrë nga mbreti i Spanjës.
Pas një takimi me mbretin, kryetarja e parlamentit spanjoll, Ana Pastor, u tha gazetarëve se Felipe VI ka vendosur të mos përfshihet në konsultime të mëtejshme me përfaqësuesit e partive, kështu që ata të mund t’i vënë në zbatim hapat që i konsiderojnë të nevojshme për t’i dhënë fund rrugës pa krye.
Kryeministri në detyrë, Mariano Rajoy, që është udhëheqësi i konservatorëve të Partisë Popullore, dështoi në dy mocione besimi javën e shkuar në parlament, duke e thelluar krizën politike në Spanjë.
Megjithatë, në një konferencë shtypi gjatë takimit të G20-tës në Kinë, ai deklaroi se do të vazhdojë të përpiqet për formimin e një qeverie të re.
Spanja ka shkuar në votime të përgjithshme dy herë brenda një viti, në dhjetorin e shkuar e gjashtë muaj më pas, pa arritur të nxjerrë një shumicë të aftë për të qeverisur.
Udhëheqësit e partive politike kanë kohë gjer në fund të tetorit të përpiqen për gjetjen e një zgjidhjeje, përndryshe në dhjetor mund të shkohet sërish në zgjedhje. /tesheshi.com/
