Mbreti i Arabisë Saudite, Salman bin Abdulaziz Al Saud ka përsëritur angazhimin e njohur të Mbretërisë për një shtet palestinez me Jerusalemin Lindor si kryeqytetin e saj.
Palestinezët kanë të drejtë për Jerusalemin Lindor të aneksuar nga Izraeli si kryeqytetin e tyre, tha të mërkurën Salman, në përgjigje të vendimit të SHBA-së për të njohur Jerusalemin si kryeqytetin e Izraelit dhe për të lëvizur atje ambasadën e saj nga Tel Avivi.
Ky adresim televiziv në Këshillin Mbretëror në Riad, erdhi të mërkurën pasi trupi kryesor pan-islam në botë, mbajti një samit emergjent në Stamboll të Turqisë.
Në samitin e Organizatës së Bashkëpunimit Islam (OIC), Presidenti turk Rexhep Tajip Erdogan i bëri thirrje botës që të njohë Jerusalemin Lindor si “kryeqytetin e Palestinës”, ndërsa Presidenti palestinez Mahmud Abbas tha se në Lindjen e Mesme nuk mund të ketë paqe përderisa është marrë një vendim i tillë.
Arabia Saudite, e cila është mirëpritëse e sekretariatit të OIC, dërgoi vetëm një zyrtar të lartë të Ministrisë së Jashtme.
“Mbretëria ka bërë thirrje për një zgjidhje politike për zgjidhjen e krizave rajonale, në ballë të së cilës është çështja palestineze dhe restaurimin e të drejtave legjitime të palestinezëve, duke përfshirë të drejtën për të krijuar shtetin e tyre të pavarur me Jerusalemin Lindor si kryeqytetin e tij”, tha Salman.
Salman tha se vendimi i Presidentit Trump “përfaqëson një paragjykim ekstrem ndaj të drejtave të popullit palestinez në Jerusalem që janë garantuar nga rezolutat ndërkombëtare”.
Salman shtoi: “Unë përsëris dënimin e Mbretërisë dhe shpreh keqardhje të madhe për vendimin e SHBA mbi Jerusalemin, për heqjen dorë nga të drejtat historike të popullit palestinez në Jerusalem”. /tesheshi.com/
