Mbreti i Arabisë Saudite Salman bin Abdulaziz al-Saud foli ashpër kundër armiqve të mbretërisë, duke thënë se Irani nuk arriti të bllokojë zhvillimin ekonomik të vendit të tij me sulme raketash dhe drone dhe përsëriti se Riad nuk do të hezitonte të mbrohej.
Në një fjalim vjetor në Këshillin e Shura-s, ai, në një fjalim 8-minutësh tha se bashkësia ndërkombëtare duhet të ndalë programin e zhvillimit të raketave bërthamore dhe balistike të Teheranit, si dhe operacionet e tij në rajon.
Sovrani saudit tha se ishte koha për t’i dhënë fund “kaosit dhe shkatërrimit” të nxitur nga Irani.
“Megjithëse mbretëria ishte në shënjestër të 286 raketave balistike dhe 289 dronëve, në mënyra që nuk është parë në asnjë vend tjetër, ajo nuk ndikoi në proceset e zhvillimit të mbretërisë ose në jetën e qytetarëve dhe banorëve të saj”, tha Mbreti Salman.
Ai deklaroi gjithashtu se politika e naftës, si eksportuesi më i madh i naftës në botë, synon të krijojë një treg të qëndrueshëm.
Ai vlerësoi aftësinë e gjigantit shtetëror Aramco për t’u rikthyer shpejt në prodhim, pas sulmit mbi objektet e tij në shtator, kur pesë përqind e furnizimit me naftë në botë u ndërpre.
Udhëheqësi saudit tha se përgjigjja e Aramco-s vërtetoi aftësinë e mbretërisë për të përmbushur kërkesën globale dhe vlerësoi ofertën e parë publike të aksioneve të kompanisë, e cila filloi këtë javë, duke thënë se kjo do të tërheqë investime të huaja dhe do të krijojë mijëra vende pune.
Mbreti Salman gjithashtu tha që Presidenca e Riadit e G20-s, e cila fillon muajin tjetër, do të jetë një dëshmi për rëndësinë e Arabisë Saudite në ekonominë globale. /tesheshi.com/
