Roger Federer mbetet mbreti i tenisit Botëror. Fenomeni zviceran, ka fituar turneun e Australian Open, duke shënuar një tjetër rekord në karrierë, pasi fiton një Grand Slam, për herë të 20-të.
Në finalen përballë kroatit Çiliç, Federer ka fituar 3-2 me sete, duke dëshmuar se ka ende për t’I dhënë këtij sporti, edhe pse ka mbushur 36 vjec.
Zvicerani e filloi në sulm ndeshjen, e në setin e parë, e dominoi Çiliç, duke e fituar me rezultatin 6-2. Seti i dytë nisi sërish nën shenjën e Federer, i cili i mori game kundërshtarit, me shërbimet e këtij të fundit. Por kroati rriti agresivitetin në lojë dhe potenca në goditjen e topit, bëri që ai jo vetëm të balanconte game-t, por edhe të fitonte me tie break, 7-6.
Seti i tretë u vendos sërish nën shenjën e Federer, i cili me goditjet e tij të klasit dhe sulmin që e nxirrte nga hiëi, arriti të fitonte një game me shërbimet e Çiliç, e të ruante shërbimet e tij, duke triumfuar edhe në këtë set me rezultatin 6-3.
Tenisti 36-vjeçar e filloi njëlloj edhe setin e katërt, duke krijuar idenë se tashmë e kishte dominuar kundërshtarin, pasi i mori game me break kroatit, duke kryesuar menjëherë 3-0 me game. Por sërish Çiliç arriti të përfundonte me pikë, goditjet e forta, duke e barazuar setin, e më pas duke fituar për herë të dytë brenda tij, me shërbimet e Federer.
Seti final rriti pritshmërinë në fushën kryesore të turneut, pasi gjithçka ishte në ekuilibër, mbase me kroatin dicka më shumë në avantazh, për shkak të moshës më të re. Por e kundërta ndodhi. Federer u shfaq më i freskët dhe pas game-ve të para ku secili ruajti shërbimin, zvicerani fitoi dy herë rradhazi me shërbimet e Çiliç, duke ruajtur edhe shërbimet e veta.
Në fund ai i dha kundërshtarit një 6-1 në setin final, duke fituar të gjithë ndeshjen me rezultatin 3-2. Mbreti Roger ngriti në këtë mënyrë një tjetër trofe të rëndësishëm, duke dëshmuar se mbetet legjenda e gjallë e këtij sporti.
Lotët e tij gjatë ceremonisë së pasndeshjes, janë dëshmi e ndjeshmërisë së madhe që ai ka për tenisin. E ndërsa publiku e duartrokiti gjatë, ai bëri edhe deklaratën që të gjithë duan ta dëgjojnë për një gjeni si ai: “Shpresoj të jem këtu edhe vitin tjetër”. /tesheshi.com/
