Këtë të mërkurë, Mbreti i Arabisë Saudite, Selman Bin Abdulaziz, nxorri një dekret me anë të të cilit cakton djalin e tij, Muhamedin, si Princ i Kurorës. Ky pozicion është mbajtur deri tani nga nipi (djali i vëllait) të Mbretit të Arabisë Saudite, Princi Muhamed Bin Naif.
Dekreti për caktimin e Princit 31-vjeçar Muhamed Bin Selman, si trashëgimtar i fronit, përfshin gjithashtu marrjen nga ana e tij të funksionit të zv. Kryeministrit teksa ai do të vazhdojë të qëndrojë edhe në postin e Ministrit të Mbrojtjes të cilin e mban që prej dy vitesh.
Mbretërit e Arabisë Sauditë kanë qënë tradicionalisht në moshë madhore midis të shtatëdhjetave apo tetëdhjetave, dhe ngritja e një Princi të ri në pozicionin e Princit Kurorës, premton se ai mund të jetë një monark që do të mbretërojë për shumë vite, në një periudhe të gjatë stabiliteti të brendshëm.
Disa vite më pare, Muhamed Ibn Selmani e përshkrunte veten thjesht si një “Jurist”, ndërsa sot është shumë pranë të qënit në krye të një prej vendeve më të fuqishme të botës arabe.
Ai gëzon një popullaritet të lartë brenda vendit dhe ka ndërrmarë një fushatë rinovimi në administratën qeveritare, duke zëvendësuar shumë nga burokratët e vjetër me teknokratë të rinj të shkolluar në Perëndim. Ai është iniciator i një plani zhvillimor ambicioz të quajtur “Vizioni 2030”, si dhe ka paralajmëruar shitjen e një pjese të aksioneve të Kompanisë Shtetërore të Naftës, ARAMCO.
Themeluesi i Mbretërisë së Arabisë Saudite, Mbreti Abdulaziz Ibn Saud, kishte disa dhjetëra bij të cilët kanë mbajtur pas tij fronin e Arabisë Saudite. I fundit në këtë linjë dinastike është mbreti aktual i Arabisë Saudite, Selman Ibn Abdulaziz, i cili erdhi në fron në vitin 2015 pas vdekjes së vëllait të tij, mbretit Abdullah Bin Abdulaziz.
Në vitin 2006, me një dekret të posaçëm, u krijua një komitet për zgjedhjen e Mbretit dhe Princit të Kurorës. Ky komitet përbëhet nga princat e lartë të Familjes Mbretërore Saudite dhe njihet si “Këshilli i Aleancës” (në arabisht: ‘Haj’etu-bej’a’). Ngritja e Muhamed bin Selmanit në pozicionin e Princit të Kurorës u miratua me pëlqimin e 31 nga 34 anëtarët të këtij këshilli.
Sakaq, dekreti për caktimin e Mohamed Bin Selmanit si Princ i Kurorës, përfshin edhe një klauzolë që nuk e lejon atë të caktojë ndonjë nga bijtë tij si trashëgimtarë.
Arabia Saudite është ndoshta vendi arab më me ndikim dhe konsiderohet si një aleat kyç i fuqive perëndimore, përfshirë këtu Shtetet e Bashkuara dhe Britaninë e Madhe. Ajo është gjithashtu prodhuesi më i madh i naftës në botë dhe konsiderohet si një nga monarkitë më të pasura të botës. Ajo është kujdestare e dy vendeve më të shenjta të Islamit, Mekës dhe Medinës, dhe pozicionohet si lider i komunitetit Islam Sunit në botë.
Ndërkohë, Princi i mëparshëm i Kurorës, Muhamed bin Naif, ka drejtuar prej shumë vitesh sigurinë kombëtare të Mbretërisë dhe njihet për pozicionin e tij të ashpër kundër militantëve xhihadistë. Në pozicionin e zëvendëskryeministrit dhe ministriti të brendshëm, ai ka ngritur strukturën aktuale të luftës kundër terrorizmit ndërsa njihet për lidhjet e mira me aleatët perëndimorë të Arabisë Saudite. Gjatë një takimi me Princin e ri të Kurorës ai shprehu pëlqimin e tij duke i uruar suksese në detyrë, ndërsa Princi Mohamed Ibn Selman iu përgjigj se nuk do të vepronte kurrë pa u këshilluar më parë me të.
Përgatiti: Alban Rreli – /tesheshi.com/
