Edhe pse vjeshtë, turizmi vijon të ofrojë surpriza në bregdetin shqiptar, sidomos atë të Sarandës. Sipas asaj çfarë njofton kreu i Agjencisë së Bregdetit, Auron Tare, një anije e famshme ka riardhur në ujrat shqiptare.
“E famshmja ” Queen Elizabeth” rikthehet përsëri për të vizituar Butrintin. Vizita e kësaj anijeje të famshme të linjës Cunard është një tjetër argument mbi vizionin që 16 vite më parë bëri të mundur krijimin e Parkut të Butrintit dhe mbrojtjen e peisazheve natyrore përqark. Kjo anije që vjen vetëm për Butrintin solli 2000 vizitorë dhe 1000 personel, një kontribut për ekonomine lokale të Sarandës”, shkruan Tare në facebook.
Siç dihet, Tare ka drejtuar për vite me radhë Parkun e Butrintit, i cili sot për sot është ndoshta i vetmi sit arkeologjik në Shqipëri i ruajtur e që nxjerr të ardhura të konsiderueshme nga vizitueshmëria e madhe.
Butrinti përbën sot një shembull se si turizmi arkeologjik mund të bëhet efiçent në të ardhura nëse shumë site në Shqipëri arrijnë të kapitalizohen dhe të përfshihen në axhenda. /tesheshi.com/
