Pas katër takimeve të para të 1/8 të Champions League-s javën e shkuar, pasojnë këtë javë katër të tjerat, me dy prej tyre që do të luhen sonte, e që janë përballjet më të nxehta.
Në 20:45 të kësaj të marte, të tërë mbështetësit e katër prej skuadrave më të mira të Europës do të mbajnë frymën, teksa Arsenali, Barcelona, Juventusi e Bajerni i Mynihut do të zbresin në fushë për t’u përballur me njëri-tjetrin.
E jashtëzakonshme vëmendja për sfidën Arsenal – Barcelona, që do të luhet në “Emirates Stadium” e do të gjykohet nga turku Cüneyt Çakır.
Të dy ekipet janë ndeshur në finalen e një dekade më parë të këtij aktiviteti, në atë të 17 majit 2006, kur katalanasit do të fitonin 2-1 e do të shpalleshin kampionë të Europës. Barcelona do ta eliminonte po ashtu Arsenalin në 2011-ën në të njëjtën veprimtari, pas një humbjeje 1-2 e një fitoreje 3-1.
Arsen Venger, trajneri i Arsenalit, e ka përshkruar Barcelonën si super favorite për ndeshjen e mbrëmjes së sotshme, por duke theksuar njëkohësisht se takimi është një mundësi për ekipin e tij që të tregojë se ka mësuar nga gabimet e shkuara në Champions League.
Juventusi e Bajerni i Mynihut do ta luajnë përballjen e tyre të parë në “Juventus Stadium”. Ndeshja do të arbitrohet nga anglezi Martin Atkinson. Juventusi kryeson kampionatin italian, duke e lënë pas fillimin e keq të sezonit dhe duke e rritur hap pas hapi lojën. Në pozita më dominuese gjendet Bajerni në Bundesligë, ku thuajse nuk njeh kundërshtar. Guardiola do t’i lërë lamtumirën ekipit pas pak muajsh, kështu që kërkon ta fitojë me patjetër trofeun e Champions League-s.
Bajerni i Mynihut i pati fituar me të njëjtin rezultat, 2-0 dhe 0-2, të dy takimet çerekfinale në Champions League me Juventusin në sezonin 2012-2013. /tesheshi.com/
