Bashkia e Tiranës ka shpërndarë sot 242 banesat sociale për familjet në nevojë duke përmbushur kështu dhe një nga premtimet elektorale të kryebashkiakut, Erion Veliaj. Vendimi është miratuar sot nga Këshilli i Bashkisë së Tiranës edhe me votat e këshilltarëve të PD-së.
Banesat sociale të cilat janë ndërtuar nga Bashkia e Tiranës shkaktuan debat edhe në këtë mbledhje të Këshillit Bashkiak, të thirrur për një sërë problematikash që dalin edhe pas shkrirjes së bashkisë me 13 komuna.
Në mbledhje, këshilltarët e PD-së kërkuan shtyrjen e ndarjes së banesave sociale në zonën e Shkozës, por një gjë e tillë është hedhur poshtë me votim.
Kryebashkiaku Veliaj kërkoi edhe marrjen e masave urgjente për të funksionalizuar bashkimin e Tiranës me 13 komunat përreth, sipas ndarjes së re territoriale.
“Qytetarët duhet të marrin të gjitha shërbimet pa ndërprerje edhe në këtë periudhë tranzicioni. Në kohë rekord duhet të rekuperojmë kohën e humbur, pasi bashkia e mëparshme nuk punonte me Ministrinë e Shtetit për zbatimin e reformës territoriale”, tha Veliaj.
Së pari, Bashkia do të unifikojë paketat fiskale të komunave me atë të Tiranës, duke mos bërë ndryshime të momentit. /tesheshi.com/
