Nga Blendi Gashi
Ka një mendim dominues, edhe në sallone politike, se mbledhjet e përbashkëta të qeverive, ato mes Shqipërisë dhe Kosovës, startuar nga “Rama 1” me Thaçin e Mustafën, nuk ka patur ndonjë efekt të madh e të ndjeshëm në terren.
E ka pranuar këtë dhe vet kryeministri Haradinaj në seancën plenare të mbajtur të premten, kur u pyet nga vetëvendosësi Xhelal Sfeçla.
Kreu i ekzekutivit tha se duhet një vlerësim i brendshëm, jo vetëm i Kosovës, por i Shqipërisë së pse po ngecë zbatimi.
Megjithatë, pak orë para kësaj deklarate, Haradinaj në mbledhjen e qeverisë të mbajtur të premten paralajmëroi mbajtjen e një mbledhje të përbashkët me qeverinë e Maqedonisë që udhëhiqet nga Zoran Zaev, për çka kërkoi nga ministrat angazhim të shtuar.
“Maqedonia është partner serioz për Kosovën dhe do të thellojmë marrëdhëniet me të. Duhet të dimë saktë numrin e marrëveshjeve, bëni gati temat që doni të diskutohen në mbledhje, prandaj mos hezitoni ta merrni me seriozitet takimin me Maqedoninë që t’i japim kuptim kohës dhe mbledhjes. Sapo të marr njoftim se janë bërë përgatitjet do të flas me Zaevin për të caktuar kohën dhe vendin”, tha Haradinaj.
Kurse i ngarkuari për këtë mbledhje, zv/kryeministri Enver Hoxhaj tha po punohet që sa më shpejt të mbahet mbledhja me Maqedoninë.
“Tani i takon kryeministrit Haradinaj të koordinohet me Zaevin për kohën dhe vendin. Janë 30 tema për trajtim, ka marrëveshje të fushave të ndryshme sigurisë, politikë të jashtme, arsim, kultura, ekonomia etj. Kemi kalendar shumë precizë dhe deri në fund të marsit keni kohë të më dërgoni temat që doni ti diskutojmë në mbledhje, pastaj mbyllet lista”, tha Hoxhaj.
Pavarësisht se ky takim po shihet si thellim i marrëdhënieve mes dy vendeve, shtrohet pyetja: ç’rezultat mund të sjellë një mbledhje e tillë, kur as mbledhjet me Shqipërinë s’kanë dhënë ndonjë rezultat të prekshëm në të mirë qytetarëve të dy shteteve?
Ja ç’thonë analistët…
Politologu Mentor Tahiri mendon se mbledhjet e përbashkëta ndërmjet qeverive të shteteve, janë shndërruar në një lloj diplomacie me shumë elemente të kurtuazisë.
Sipas tij, përvoja e deritanishme tregon se nga këto takime nuk mund të pritet shumë dhe lidhen marrëveshje më të cilat më pas askush nuk merret.
“Sigurisht që ky është një momentum i ndjeshëm pas aprovimit të Ligjit për gjuhët në Maqedoni, e në këtë drejtim mbledhja e përbashkët do të ngarkohet me dozë të panevojshme ‘spektaklesh’ patriotike. Por sa për të shuar iluzionet që përcaktuese për mbledhje të përbashkët janë ‘integrimet ndërshqiptare’, duhet kujtuar se më vonë gjatë këtij viti do të mbahet gjithashtu një mbledhje e përbashkët e qeverisë së Maqedonisë dhe asaj të Serbisë në qytetin e Nishit”, thotë Tahiri për tesheshi.com.
Edhe analisti politik Gurakuq Kuçi, nuk beson se mbledhja në fjalë mund të japë ndonjë rezultat të prekshëm, gjithmonë duke ju referuar takimeve të qeverive shqiptare që sipas tij kanë dhënë rezultate minimale.
“Mbledhje te tilla të vendeve fqinjë e sidomos në rastin e Ballkanit Perëndimor janë të mira pasi trasojnë rrugën për një të ardhme paqësore. Por fatkeqësia është se vendet e Ballkanit Perëndimor nuk posedojnë politikë dhe politikanë shtetar por kryesisht oligarkë që punojnë për interesa klanore dhe obstruksionist të çmendur për të ndaluar zhvillimin dhe ndryshimin për të mirë. E njëjta është edhe tek rasti i Kosovës, ku takimi i qeverive shqiptare ka dhënë rezultate pothuajse minimale, kjo për faktin e vetëm se klasat politike të të dyja vendeve, nuk kanë qenë të interesuara asnjëherë për bashkëpunim dhe zhvillim të shteteve por vetëm ruajtjen e ‘oligarkive funksionale brenda demokracive formale’. Po të bënin vërtet hapa zhvillimor sigurisht që vendet do të pësonin zhvillim por edhe konsolidim të demokracisë dhe meritokracisë. E njëjta do jetë edhe me Maqedoninë, sepse Kosova as nuk ka kuadër në qeverisje, e ata që janë në qeverisje, as nuk duan të kenë kuadër e as nuk duan të prishin oligarkinë e tyre me gjithë spektrin politik”, thotë Kuçi për tesheshi.com.
Ai shton më tej se heqja e barrierave, hapja e tregut, heqja e limiteve doganore, integrimi dhe investimi i përbashkët ekonomik, ia humbë automatikisht klasës politike oligarkike fuqinë politike. /tesheshi.com/
