Partia Demokratike ka akuzuar sot Kryeministrin Edi Rama se ka vërsulur bandën e OSHEE kundër qytetarëve me një valë të re represioni, abuzimi, mbifaturimi, për të rrjepur sa më shumë para kryesisht nga familjet që po vuajnë krizën ekomonike.
“Faturimet shkruhen sipas nevojës për të mbushur arkën e Edi Ramës, e jo sipas konsumit. Vetëm për vitin e kaluar, 91 mijë e 400 qytetarë janë ankuar për faturimet abuzive. Gjahu i preferuar janë familjet që kursejnë energjinë dhe kur matësi tregon pak. Shtëpitë në zonat e plazhit janë gjithashtu objekt sulmi. Faturohen sikur të kenë konsum normal edhe banesa emigrantësh që janë prej kohësh të mbyllura e ku nuk jeton njeri”, – tha zëdhënësja e PD-së, Ina Zhupa.
Ajo shtoi se paratë që merr me dhunë e me manipulim faturash, Edi Rama i ndan më pas me miqtë e tij, me tendera ku fituesit janë të paracaktuar.
“Mbifaturimi është krim, dhe ata që e kryejnë këtë krim duhet dhe do të mbajnë përgjegjësi. Qytetarët e abuzuar nga ky mbifaturim, nuk kanë asnjë detyrim, dhe ky abuzim është një thirrje për mosbindje civile”, – përfundoi deklaratën e saj nga selia blu zëdhënësja demokrate. /tesheshi.com/
