Prefekti i Izmirit, Erol Ajjëlldëz, ka deklaruar se PKK-ja, organizata terroriste kurde, mendohet të jetë përgjegjëse për sulmin para gjykatës.
Sipas tij, terroristët kishin qenë të armatosur me kallashnikov dhe me granada.
Veç kësaj, prefekti bëri të ditur se një tjetër makinë me lëndë shpërthyese ishte zbuluar gjithashtu nga policia turke, për t’u shpërthyer më pas në mënyrë të kontrolluar.
Akti më i fundit terrorist ndodhi këtë pasdite para një gjykate në Izmir. Një makinë u ndal para gjykatës, dhe para se ajo të shpërthente pati përplasje me policinë.
Nga sulmi pati dy viktima, njëri prej të cilëve ishte punonjës policie e tjetri punonjës i gjykatës; shtatë qenë të plagosurit.
Dy terroristë gjetën vdekjen, ndërsa pati shkëmbim zjarri midis policisë dhe terroristëve brenda dhe pranë gjykatës.
Sulmi i sotëm terrorist pason atë të orëve të para të 2017-s në Stamboll, ku humbën jetën e u plagosën dhjetëra persona.
Presidenti Erdogan do të deklaronte sot në Ankara se Turqia gjendej nën sulmin e përbashkët të grupeve terroriste, por se organizatat terroriste nuk do t’ia dilnin ta përçanin vendin.
“Ato nuk mund ta shkatërrojnë unitetin tonë; nuk do të jenë në gjendje ta bëjnë këtë,” i tha Erdogani një mase të madhe qytetarësh të mbledhur për një ceremoni përuruese. /tesheshi.com/
