40.55 për qind e qytetarëve të Drenasit e kanë shfrytëzuar sot të drejtën e votës, apo 21 mijë e 318 qytetarë nga gjithësejt 52 mijë e 569 qytetarë me të drejtë vote.
Këtë shifër e ka dhënë Valdete Daka, kryetare e Komisionit Qendror të Zgjedhjeve në konferencën e mbajtur në ora 19:00.
Ndryshe, në zgjedhjet lokale (2013) patën votuar 24 mijë e 362 votues, apo 48.66%.
Daka, në emër të institucuionit që drejtoi falënderoi të gjithë qytetarët e Drenasit që shfrytëzuan të drejtën e tyre për të votuar dhe për kulturën e lartë demokratike të treguar sot, duke mos dhënë ndonjë detaj për problemet që mund të janë shkaktuar gjatë procesit.
Daka, njoftoi se në orën 21:00 proitet të bëhen publike rezultatet preliminare të zgjedhjeve në Drenas.
Ndonëse kreytarja e KQZ-së nuk foli për problemet e paraqitura, policia e Kosovës përmes një njoftimi për media ka treguar se për zgjedhjet në Drenas, prej orës 07:00, janë shoqëruar në stacione policore 7 persona, prej tyre 5 si të dyshuar, ndërsa 2 në cilësinë e dëshmitarëve, por që të gjithë pas përfundimit të procedurave policore me urdhër të prokurorëve përkatës janë liruar.
Edhe organizatat që monitoruan procesin e zgjedhjve në Drenas gjatë ditës raportuan për disa probleme, si votim familjar, paraqitje e personave të vdekur në listat e votimit, fotografim të votës etj.
Kurse, problemi më i madh që u ngrit në orët e vona nga partia NISMA për Kosovën është ndërprerja e energjisë elektrike në disa vendvotime, por që një gjë e tillë është mohuar nga KEDS-i.
Ndryshe, gjysmë ore pa u mbyllur vendvotimet simpatizantët e PDK-së veç kanë filluar festën nëpër rrugët e Drenasit. Kjo parti ka paraparë një koncert në sheshin e qytezës siç thonë për të festuar fitoren e kandidatit të tyre Ramiz Lladrovci, edhe pse ende nuk është dhënë asnjë rezultat, qoftë edhe ai preliminar. /tesheshi.com/
