Peticioni për arrestimin e kryeministrit izraelit, i publikuar më 7 gusht nga aktivisti Damian Moran, ka marrë deri tani mbi 100.000 nënshkrime.
Në të thuhet mes të tjerash, “Benjamin Netanyahu do të zhvillojë bisedime në Londër këtë shtator. Nën ligjin ndërkombëtar, ai duhet të arrestohet për krime lufte me të arritur në Mbretërinë e Bashkuar, për masakrën ndaj mbi 2.000 civilëve në vitin 2014.”
Parlamenti britanik i merr në shqyrtim për debat të gjitha peticionet e publikuara në faqen e tij elektronike që sigurojnë më tepër se 100.000 nënshkrime, e kështu duhet të bëjë dhe në këtë rast.
Ndërkohë, qeveria britanike e ka hedhur tashmë poshtë peticionin për arrestimin e Netanyahu-t. Në një njoftim të saj është thënë prerë se, “Nën ligjin ndërkombëtar dhe të Mbretërisë së Bashkuar, kryetarët vizitorë të qeverive të huaja, si kryeministri Netanyahu, kanë imunitet ndaj procesit ligjor, dhe nuk mund të ndalohen apo të arrestohen.”
Ajo i ka cilësuar si vetëmbrojtje aksionet ushtarake izraelite vitin e shkuar në Rripin e Gazës, për ta mbyllur njoftimin me vënien në pah të marrëdhënieve të shkëlqyera midis dy vendeve, “Mbretëria e Bashkuar është mike e ngushtë e Izraelit, dhe ne gëzojmë një marrëdhënie të shkëlqyer dypalëshe.”
Kryeministri izraelit do ta vizitojë Londrën javën e ardhshme. Gjatë vizitës parashikohen të merren masa të rrepta sigurie, për t’u dalë përpara protestave kundër tij.
Vetë organizatori i peticionit e pranon se nuk ka besuar se Netanyahu do të arrestohej, duke e bërë të qartë qëllimin e tij, që ka qenë krej tjetër. “Unë sinqerisht nuk pres që ai të arrestohet … është një mesazh i qartë për të se ka një numër të madh njerëzish që nuk e duan atë këtu,” i deklaroi ai rrjetit informues Al Jazeera. /tesheshi.com/
