Ashtu siç pritje, punimet në seancën plenare kanë patur në fokus të debateve ligjin për importin e mbetjeve. Ndërkohë që protestat jashtë ambjenteve të parlamentit vijonin, që prej natës së kaluar, debatin për këtë temë e ka hapur fillimisht nënkryetari i Partisë Demokratike, Edmond Spaho. Ai kërkoi që të bëhet sa më shpejt shqyrtimi i dekretit të Presidentit për kthimin e ligjit të importit të mbetjeve në Kuvend. Po ashtu, ai ka apeluar kryeparlamentarin Ilir Meta dhe kreun e PDIU-së, Shpëtim Idrizi që të mos negociojnë me Edi Ramën.
“I bëj thirrje kryetarit të Kuvendit dhe njëkohësisht i LSI-së, Ilir Meta dhe të PDIU-së Shpëtim Idrizi të mos negociojnë me Edi Ramën për të gjetur rrugë për ta kaluar në kohë të tjera. T’i qëndrojnë premtimit që kanë dhënë pa konsensusin e shoqërisë civile nuk do të ketë miratim. Ka vetëm një konsesus, që ky ligj të rrëzohet dhe t’i japim fund këtij projekti kaq të ndyrë e të rrezikshëm, jo vetë për njerëzit tonë po për gjenerata të tëra”, u shpreh Spaho.
Kjo çeshtje u prek edhe nga deputeti Ben Blushi. Ndërsa ka përsëritur qëndrimin e tij kundër këtij ligji, ai u ka bërë apel deputetëve që ta sjellin atë për ta votuar, por sipas tij nuk i kanë votat e mjaftueshme. “Silleni ligjin ta votoni, por unë besoj se s’keni votat e mjaftueshme. Përveç votave të keqbërësve, se vota keqbërësish keni me shumicë në këtë Parlament. Por besoj se nuk do ta bëni nga frika”, ka thënë Blushi.
“Janë përgatitur gjithë kazanët e jugut të Italisë dhe veriut të Greqisë, për t’u derdhur në Shqipëri. Shqipëria nuk ka kapacitete për të pastruar këto mbetje, madje, ajo ka më shumë se ç’duhet mbetjet e saj. Nuk ka asnjë vend nga Kroacia në Greqi, që jetojnë me turizëm, që të pranojë mbetjet”, deklaroi ai.
Ai ka risjellë në vëmendje se miratimi i këtij ligji do të përkeqësonte edhe më shumë ndotjen e ambinetit. Sipas tij, ndotja e ajrit po shkakton rritjen e personave të prekur nga sëmundje të rënda.
“Shqipëria po kap vendin e parë në Europë për rritjen alarmante të sëmundjeve kancerogjene. Po ulet mosha e të prekurve nga kanceri, po shkon nën 20 vjeç. Kjo vjen nga ndotjet në atmosferë, nga uji i kontaminuar dhe ju mendoni se ky ligj vlen më shumë se mijëra jetët e pacientëve në Shqipëri? Të marrim edhe mbetjet e Europës për të sëmurur edhe atë që kanë mbetur”, tha Blushi./tesheshi.com
