Nga Ylli Pata
Shumë u fol dhe po flitet ditët e fundit në lidhje me mundësinë e importit të mbeturinave.
Qarqe pranë LSI-së e kanë akuzuar Edi Ramën se ka aritur marrëveshje me konsorciume të fuqishme gjermane për të importuar mbetje të rrezikshme në Shqipëri.
Artur Zheji e bën të ditur këtë ë një shkrim jo me emër të tij në portalin pranë LSI-së, 350 gradë.
Ndërkaq, Blendi Fevziu, në një shkrim të tijin thekson se mbetjet radioaktive kanë ardhur në Shqipëri prej kohësh.
“Më 2008 mediat franceze njoftuan se në Shqipëri kishte hyrë një sasi mbetjesh radioaktive tejet të rrezikshme. Fati dhe destinacioni i tyre mbeti i panjohur atëherë dhe sot. Nisur nga ky rast dhe sinjale te tjera, Qeveria vendosi ta kufizojë importin e plehrave, ose së paku ta vendoste atë në baza ligjore. Për këtë u hartua një ligj në vitet 2010 – 2011 që parashikonte menaxhimin e mbetjeve dhe kufizimin e importit në vetëm 45 zëra. Pra ishte një lloj limitimi për importin pa kufi që kishte qenë deri atë ditë”, shkruan Fevziu.
Ndërkaq Shqipëria ka qenë objekt i ardhjes së lëndëve të dyshimta që prej rrëzimit të komunizmit.
Ata erdhën nga Gjermania në stacionin hekurudhor të Bajzës në Malësinë e Madhe dhe qëndruan atje për 20 vite duke mos u trajtuar nga asnjë qeveri.
Në Stacionin Hekurudhor Ndërkombëtar, mbetjet qëndruan prej 20 vitesh dhe janë larguar vetëm në vitin 2013.
Pasojat e këtyre mbetjeve toksike ndihen edhe në ditët e sotme tek njerëzit që punojnë dhe banorët aty pranë. Këto lëndë helmuese që ndodhen në stacionin hekurudhor të Bajzës duket se shumë shpejt do të hiqen dhe do të asgjësohen jashtë Shqipërisë.
Mbetjet u sollën në vitin 1991, kur nga Gjermania kanë ardhur në bidonë sasi tepër të mëdha me mbetje toksike e të lëngshme.
Një pjesë e këtyre u kthyen mbrapsht për në Gjermani, ndërsa pjesa tjetër për fat të keq jo vetëm që qëndroi këtu, por banorë të zonës i morën duke i derdhur në territorin përreth.
Bidonët u mbushën me raki, dhe ujë nga banorët e zonës.
Ndërsa një sasi tjetër, rreth 20 tonë, ka ardhur nga kombinati kimiko-metalurgjik i Elbasanit dhe është një lëndë në formën e një gëlqereje të ngurtë tepër të rrezikshme, natro-ferro-silicium, me formulë NA2 S2 F6, e cila u soll në thasë.
Një pjesë e madhe e lëndës toksike është derdhur në tokë, duke ndotur barin ku kullotin bagëtitë dhe ka depërtuar dhe në ujërat nëntokësore, duke u bërë kështu një element mjaft i rrezikshëm.
Banorët e Bajzës janë ankuar shpesh për problem shëndetësore.
Një nga banorët e zonës, Rrok Bucaj, thekson se “Situata është mjaft e rëndë, njerëzit këtu të gjithë kanë dhimbje koke, debulesë, sidomos kur ka vranësira apo fryn erë. Nuk kanë munguar rastet kur janë shfaqur sëmundje të rënda si tumore, leucemi apo gratë kanë lindur fëmijët me defekte. Të gjitha këto kanë ndodhur nga mbetjet toksike që janë te magazinat e stacionit hekurudhor”.
Tek banorër shfaqen vazhdimisht sëmundje nga më të rëndat. Ata i kanë bërë apel shtetit të ndërhyjë, pasi ata po jetojnë me vdekjen./tesheshi.com/
