Përfaqësuesja angleze ka mbetur pa drejtues teknik që me largimin e Roy Hodgson-it pas eliminimit në Euro 2016.
Janë një sërë emrash që përmenden si kandidatë të mundshëm për ta marrë drejtimin e kësaj kombëtareje problematike, që prej dekadash nuk ka një sukses të qenësishëm.
Në epërsi për t’u emëruar si trajner i anglezëve është Sam Allardyce, tekniku 61-vjeçar i Sandërlendit. Por BBC-ja shton dhe pesë emra të tjerë në listën e kandidatëve. Arsene Wenger, Glenn Hoddle, Jurgen Klinsmann, Eddie Howe dhe Steve Bruce shihen po ashtu si kandidatë për këtë detyrë të vështirë.
Ndërkaq, tekniku i përfaqësueses së Shqipërisë, italiani Gianni de Biasi, ka dhënë një intervistë për britaniken The Sun, ku nuk bën as mundimin më të vogël që ta fshehë dëshirën për ta drejtuar kombëtaren angleze.
“Puna si trajner i Anglisë do të ishte një mundësi e veçantë për mua. Një ofertë të tillë nuk do ta ktheja mbrapsht. Mendoj se së bashku do të arrinim rezultate fantastike,” ka deklaruar De Biasi.
Megjithatë, pak gjasa ka që anglezët ta bëjnë atë pjesë të listës së kandidatëve, duke patur parasysh konservatorizmin e tyre. /tesheshi.com/
