Kryeministri Rama ka marrë një tjetër mbështetje nga qeveria e Kancelares Merkel me gojën e kreut të diplomacisë së Berlinit, Sigmar Gabriel. Në një takim që ky i fundit ka patur me shefin e qeverisë shqiptare, është shprehur se reformat e nisura, sado me kosto, duhet të çohen deri në fund.
“Në prag të proceseve zgjedhore, reformat nuk janë të thjeshta. Shumica e shqiptarëve dëshirojnë stabilizimin dhe avancimin e mëtejshëm drejt BE-së. Shqipëria ka mundësinë e madhe historike që t’i bashkohet Europës, e kjo e fundit ka mundësinë të bashkëpunojë me Shqipërinë dhe fqinjët e saj për paqen e stabilitetin. Për këtë, ju jeni një garant”, ka thënë vartësi i Angela Merkelit.
Ndërsa Rama nga ana e tij, ka potencuar mbështetjen gjermane për Reformën në Drejtësi.
“Falë mbështetjes jemi në një proces shumë të avancuar. Shpresojmë të jemi në lartësinë e sfidës për të filluar zbatimin e reformës me Vetingun e gjyqtarëve e prokurorëve. Shqipëria, partner shumë i angazhuar për këtë marrëdhënie kaq të veçantë të Gjermanisë me rajonin”, ka theksuar Rama.
Kujtojmë që impasin e parë për t’iu futur Reformës në Drejtësi, pa u mjaftuar thjesht me retorikë denoncuese mbi derexhen e Drejtësisë shqiptare, Rama e ka prej Kancelares Merkel, e cila ia ka kërkuar me ngut këtë gjë. /tesheshi.com/
