Bashkimi Evropian, në partneritet me Organizatën Botërore të Shëndetësisë, ka nisur një projekt të ri rajonal me vlerë më shumë se 7 milion euro për të mbështetur vaksinimin e sigurt dhe efikas të popullatës në Ballkanin Perëndimor.
Zbatimi i projektit do të ndihmojë përgatitjen e rajonit për pritje efektive dhe vaksinim kundër COVID-19, duke përfshirë vaksinat nga programi Covax dhe përmes një mekanizmi për ndarjen e vaksinave me anëtarët e BE, tha Komisioni Evropian sot.
Projekti i BE do të ndihmojë gjithashtu në rritjen e qëndrueshmërisë së rajonit ndaj krizave shëndetësore dhe do të mbështesë Ballkanin Perëndimor në rrugën drejt financimit të qëndrueshëm të kujdesit shëndetësor universal.
Trajnimi i punonjësve shëndetësor
Aktivitetet e planifikuara përfshijnë zhvillimin dhe testimin e planeve të gatishmërisë emergjente, trajnimin e punonjësve shëndetësorë dhe zhvillimin e një sistemi të menaxhimit të informacionit të vaksinimit.
“Me një projekt të ri të mbështetjes së vaksinimit në Ballkanin Perëndimor në partneritet me OBSH, BE vazhdon të përmbushë angazhimin e saj për të mbështetur partnerët (në rajon) në trajtimin e pandemisë”, tha Komisioneri Evropian i Fqinjësisë dhe Zgjerimit Oliver Varhelyi.
Ai gjithashtu tha se projekti i ri shkon në një paketë 70 milion euro për të mbështetur mundësinë e vaksinave në rajon dhe për të siguruar pajisjet e nevojshme. /tesheshi.com/
