Më shumë se një mijë kryebashkiakë italianë kanë nënshkruar një peticion duke kërkuar që kryeministri Mario Draghi, i cili ofroi të jepte dorëheqjen të enjten, të mbetet në detyrë.
“Qeveria duhet të vazhdojë punën e saj”, thanë ata në një peticion të nënshkruar nga kryebashkiakët e Firences, Romës dhe Venecias, ndër të tjera.
Të enjten, Draghi i ofroi dorëheqjen presidentit Sergio Mattarella, i cili nuk e pranoi atë dhe “e ftoi atë t’i drejtohej parlamentit për të vlerësuar situatën”. Draghi donte të jepte dorëheqjen për shkak të mospjesëmarrjes së Lëvizjes 5 Yje (M5S, anti-sistemi), anëtare e qeverisë së koalicionit, në votëbesimin e kërkuar nga qeveria.
Në peticion, kryetarët e bashkive dënuan “sjelljen e papërgjegjshme” të Lëvizjes 5 Yje. Në të njëjtën kohë, ata theksuan se ngjarjet politike në Itali i ndjekin “me mosbesim dhe shqetësim”.
Dalja nga kriza e shkaktuar nga pandemia COVID-19 dhe kriza sociale “sot më shumë se kurrë kërkojnë stabilitet, siguri dhe unitet në mënyrë që të vazhdojmë ndryshimet në qytetet tona”, shtojnë ata.
Ish-kryeministri Silvio Berlusconi dhe lideri i ekstremit të djathtë Matteo Salvini, partitë e të cilëve janë pjesë e shumicës së qeverisë, thanë të dielën se nuk mund të bashkëpunojnë më me 5 Yjet për shkak të “paaftësisë dhe mosbesueshmërisë së tyre”.
Berluskoni dhe Salvini thanë në një deklaratë të përbashkët se ata janë të gatshëm për zgjedhje “edhe në afat të shkurtër”. Zgjedhjet fillimisht ishin planifikuar për fillimin e vitit 2023. /tesheshi.com/
