Mbështetja surprizë nga Athina: Turqia ka të drejtën e tubimeve në Europë

Ndërsa marrëdhëniet e Turqisë me Holandën dhe Gjermaninë janë acaruar deri në ngrirje të lidhjeve diplomatike, për Ankaranë vjen një mbështetje surprizë nga Athina. Numri dy i diplomacisë greke, Jorgos Katrougalos, mbështeti publikisht argumentet e Ankarasë, gjatë një interviste me televizionin privat grek, Skai. Ai ka stigmatizuar vendimin e autoriteteve holandeze për të mos lejuar ministrat turq të zhvillojnë fushatë në Holandë për referendumin e 16 prillit.

“Unë nuk mund të gjykoj për vendimet e brendshme të vendeve të tjera, mirëpo rregulli në Europë, një kontinent të drejtash dhe lirish, është në favor të veprimtarive të tilla. Me të vetmin kusht që të mos ketë rrezik për sigurinë publike”, u shpreh ai.

Dy ditë para mbajtjes së zgjedhjeve parlamentare në Holandë, zyrtari i lartë grek, ka ndërlidhur reagimet e Amsterdamit pikërisht me ballafaqimin elektoral të së mërkurës.

“Nuk është e lejueshme që klima zgjedhore të helmojë marrëdhëniet midis vendeve”, u shpreh ai, ndërsa deklarata është përshëndetur nga media turke. E përditshmja Hurryiet, e cilësonte si një surprizë mbështetjen e ofruar nga Athina. Ndërkaq, media greke ka kritikuar me tone të ashpra, një tjetër pozicionim të ministrit, kur u pyet nëse Athina zyrtare do të lejonte zyrtarë turq që të zhvillonin veprimtari të ngjashme në zonën e Trakës, në verilindje të Greqisë.

“Ne përpiqemi që marrëdhëniet me Turqinë të jenë miqësore. Janë zhvilluar edhe më përpara vizita të zyrtarëve turq në Trakë. Nuk ka arsye të mos lejojmë komunikimin me ta, por nga ana tjetër nuk ka as edhe një arsye që të ushqejmë një tension që në këto momente ekziston në Europë dhe rrezikon të krijojë probleme në marrëdhëniet tona”, tha ai. /tesheshi.com/