Forcat turke të sigurisë kanë kryer këtë mëngjes kontrolle në ambientet e së përditshmes Cumhuriyet, duke ndaluar nëntë persona, mes të cilëve kryeredaktorin Murat Sabuncu.
Urdhra arrestimi janë lëshuar dhe për 15 punonjës të tjerë të kësaj gazete, duke përfshirë drejtuesin e bordit ekzekutiv, Akın Atalay, që njoftohet të jetë jashtë territorit të Turqisë.
Një urdhër arrestimi ka dhe për ish-kryeredaktorin, Can Dündar, i dënuar në maj me pesë vite e dhjetë muaj burg për nxjerrje të sekretit shtetëror, e që tani mendohet se gjendet në Gjermani.
Një njoftim nga zyra e prokurorisë së Stambollit bën të ditur se hetimi mbi figurat ekzekutive të gazetës ka nisur më 18 gusht për kryerje të krimeve për llogari të FETÖ-s, Organizatës Terroriste Gyleniste, dhe të PKK-së, organizatës terroriste kurde.
Yeni Şafak i referohet një burimi që nuk bëhet i njohur, e sipas të cilit të dyshuarit akuzohen se janë anëtarë të FETÖ-s e të PKK-së, e se kanë kryer krime në emër të tyre.
Më e vjetra gazetë turke ende në botim, me një qëndrim të pastër shekullarist e të majtë, Cumhuriyet-i i është kundërvënë hapur AKP-së, Partisë për Drejtësi e Zhvillim, që me ardhjen e saj në pushtet në vitin 2002.
Në majin e vitit të shkuar, gazeta publikoi materiale sekrete që synonin ta vinin me shpatulla pas muri qeverinë e AKP-së, me objektiv kryesor shkatërrimin e imazhit të presidentit të Turqisë.
Që prej puçit të dështuar të kësaj vere, Turqia është në gjendje të jashtëzakonshme. /tesheshi.com/
