Sekretari amerikan i Shtetit, John Kerry i telefonoi për të tretën herë homologut të tij rus, Sergei Lavrov në përpjekje për të sqaruar qëllimet e Moskës për rritjen e pranisë ushtarake në Siri.
Kerry paralajmëroi se vijimi i mbështetjes për presidentin Bashar al-Assad “rrezikon përshkallëzimin dhe zgjerimin e konfliktit”.
Shtetet e BAshkuara akuzojnë Rusinë se po shton praninë ushtarake në Siri, por Moska, aleate e vjetër e presidentit Assad edhe përpara luftës civile, thotë se po ndihmon këtë vend në përballjen me Shtetin Islamik.
Ndihma ushtarake e Moskës vjen në një moment kur regjimi sirian është duke humbur terren përballë kryengritësve.
Korrespondentët vënë në dukje se telefonata e Kerrit për Lavrovin është e treta në dhjetë ditët e fundit e kjo nënvizon alarmin në Perëndim për lëvizjet më të fundit ruse.
Një deklaratë e Departamentit amerikan të Shtetit thotë se Kerry paralajmëroi homologun rus se mbështetja për Assad-in “po minon qëllimin e përbashkët për të luftuar ekstremizmin, nëse nuk mbetemi të fokusuar në gjetjen e një zgjidhjeje për konfliktin në Siri përmes një tranzicioni të ndershëm politik”.
Sekretari Kerry i ka konfirmuar Moskës se SHBA janë të angazhuara në betejën kundër Shtetit Islamik në koalicionin që përfshin më shumë se 60 shtete e ku regjimi i Assad nuk do të jetë kurrrë një anëtar i besueshëm.
Shtëpia e Bardhë e ka përshkruar mbështetjen e Moskës për presidentin sirian si “një bast humbës”. /tesheshi.com/
