Disa sirianë nga Damasku, mbështetës të regjimit të Asadit janë ndalur për të bërë selfie “turistike” nëpër rrugët e shkatërruara të Halepit, duke shkaktuar kështu reagime nëpër mediat sociale, ndërkohë që banorët po ikin me ndihmën e ekipeve të evakuimit për të shpëtuar të gjallë nga qyteti.
Ata, “provokatorët” kishin ardhur në Halep nga Damasku, duke bërë një vizitë në qytetin tragjik si një në vend turisti. Ata kanë bërë fotografi përpara shtëpive, makinave, ndërtesave të shkatërruara si dhe në qendër të qytetit, si dhe duke festuar shkatërrimin etij nga regjimi dhe grupet mbështetëse.
Ndërsa ditë më parë, gra, fëmijë dhe banorët e tjerë të Halepit janë larguar nga rrugët e goditura nga sulmet ajrore, në të njëjtat rrugë tani përkrahësit e regjimit po dalin të gëzuar dhe të lumtur duke bërë selfie.
Ditë më parë, ndërsa zjarri i luftës qe në kulm, ku forcat e regjimit dhe mbështetësit rusë, shiia iranianë e libanezë po merrnin Halepin lindor duke shkaktuar masakra të pashembullta, gjë që vijoi të ndodhte dhe pas tërheqjes së trupave opozitare, mediat transmetonin pamje nga lokalet e natës së pjesës tjetër të Halepit, ku njerëzit ishin të zhytur në qejfe. /tesheshi.com/
