Anija e parë e ngarkuar me drithë që u largua nga Ukraina që nga fillimi i luftës me Rusinë, lundroi për në Liban të mërkurën pas një inspektimi nga një ekip nga Qendra e Përbashkët Koordinuese (JCC) në Stamboll, raporton Anadolu Agency (AA).
Anija me flamur të Sierra Leone, e ngarkuar me më shumë se 26,500 ton misër, mbërriti në ngushticën e Stambollit në hyrje të Detit të Zi të martën mbrëma dhe u ankorua në vendndodhjen e saj të caktuar.
Kontrollet zgjatën më shumë se një orë dhe pak më pas Ministria e Mbrojtjes Kombëtare turke njoftoi në Twitter se anija “Razoni” së shpejti do të kalojë përmes ngushticës dhe do të vazhdojë drejt Libanit.
Ministri ukrainas i Infrastrukturës Oleksandr Kubrakov gjithashtu postoi në Twitter se anija ishte inspektuar “me sukses” nga delegacioni, duke shtuar se ishte “gati të vazhdonte udhëtimin e saj në portin e Tripolit në Liban”.
Anija u nis të hënën nga porti ukrainas i Odesës, si rezultat i marrëveshjes për rinovimin e dërgesave të grurit ukrainas nga portet e Detit të Zi, e cila u nënshkrua nga Ukraina dhe Rusia më 22 korrik në Stamboll, me ndërmjetësimin e Turqisë dhe Kombeve të Bashkuara.
Sipas marrëveshjes, u krijua Qendra e Përbashkët Koordinuese për të kryer inspektime të përbashkëta në hyrje-daljet e porteve, duke garantuar sigurinë e itinerareve.
Turqia, e vlerësuar nga komuniteti ndërkombëtar për rolin e saj ndërmjetësues, koordinoi me Moskën dhe Kievin hapjen e një korridori nga qyteti port ukrainas i Odesës për të rifilluar dërgesat globale të drithit që ishin ndalur që nga 24 shkurti për shkak të luftës ruso-ukrainase. /tesheshi.com/
