Edi Rama ka shpallur se tashmë sistemi është gati që emigrantët të votojnë në vendet ku jetojnë, por ende nuk e ka bërë të ditur a do të ndodhë kjo më 18 qershor.
Kërkesa e PS-së në Komisionin e Zgjedhjeve është hedhur poshtë nga ana e PD dhe LSI-së, por Kryeministri ka dalë sot dhe ka prezantuar një projekt gjerman që është instaluar në të gjitha konsullatat shqiptare në botë.
Rama tha: “Procesi ka filluar. Ky regjistrim i përgjithshëm që ka nisur e që do të shtrihet në të gjitëh territoret ku jetojnë shqiptarët përmes aplikimeve online do të na japë mundësi që më herët se sa vonë të mund ti përfshijmë shqiptarët jashë vendit në procesin demokratik duke i dhënë mundësi të votojnë nga aty ku janë e mos të jenë të detyruar të vijnë në Shqipëri për të votuar. Kuptohet që dhe kjo do të kërkojë kohën e vet”.
Ndërkaq, Stefan Çipa, njeriun që Rama e ka emëruar Zv.ministër të Brendshëm fill pas mënjanimit të armikut të tij Koço Kokëdhima, ka hapur një faqe të tij zyrtare, duke bërë tashmë të qartë se do të jetë një nga kandidatët për deputet.
Çipa që është angazhuar për regjistrimin e shqiptarëve jashtë vendit ka publikuar foto dhe informacion nga procesi i përfshirjes së emigrantëve në sistemin shtetëror të regjistrave.
Ndërkaq, Edi Rama sot u shpreh për një unifikim të shërbimeve konsullore me Kosovën, por duke theksuar se kjo nuk do të thotë se bëhet fjalë për një Shqipëri të Madhe. Ndërsa ministri i Jashtëm Ditmir Bushati foli për një monitorim të konsujve në të gjitha nivelet. “Krjimi për herë të parë i një arkive të saktë dixhitale dhe të aksesueshme të të gjithë dokumentacionit të shërbimeve konsullore. Tashmë dhe ai do të ketë kujtesën e vetë institucionale”, tha Bushati.
Në Shërbimin Konsullor Online do të gjenden plot 36 shërbime konsullore me procedura të thjeshta, të unifikuara në një platformë të vetme. /tesheshi.com/
