Prej kësaj të enjtje, kur edhe ulet në Toronto avioni i parë me sirianë, nis mbërritja e 25.000 sirianëve në Kanada, një premtim i qeverisë së re. Të shtunën do të ulet një tjetër avion në Montreal, duke sjellë kështu 300 sirianë vetëm në dy ditë. Refugjatët do të kenë mundësi të pajisen me shtëpi në Kanada, falë sponsorëve privatë që janë treguar të gatshëm t’i përgatisin për ta.
“Ka për të qenë një ditë e madhe”, është shprehur të mërkurën kryeministri i ri i vendit, Justin Trudeau, duke iu referuar ditës së sotme.
Trudeau ka deklaruar po ashtu se, “Risistemimi i refugjatëve tregon angazhimin tonë ndaj kanadezëve dhe botës se Kanadaja e kupton që ne mund dhe duhet të bëjmë më shumë.”
Për në Toronto dhe Montreal do të ketë dhjetëra fluturime në javët e ardhshme, pasi qeveria kanadeze synon të sjellë 10.000 sirianë gjer në fund të vitit, e 15.000 të tjerë nga fundi i shkurtit.
Refugjatët do t’u nënshtrohen fillimisht kontrolleve mjekësore, për të kryer më pas formalitetet administrative, me hap të tretë shpërndarjen në 36 qytete të vendit. Avioni që mbërrin sot mbart sirianë nga kampet e Jordanisë dhe Libanit. /tesheshi.com/
