Eshtë ankoruar për herë të parë në thuajse dyzet vjet një anije turistike amerikane në brigjet e Kubës. Një pritje e ngrohtë i është rezervuar anijes me turistë amerikanë, që simbolizon një tjetër hap në kuadër të përmirësimit të marrëdhënieve mes SHBA-ve dhe Kubës.
Heqja vetëm para një jave e një ligji që e ndalonte hyrjen në vend nga deti të shtetasve amerikanë e ka mundësuar mbërritjen e anijes turistike.
Carnival Corp’s Adonia është një anije e vogël, me një kapacitet prej 700 pasagjerësh, dhe do të lundrojë dy herë në muaj nga Majami në Havana, me një çmim që nis nga 1.800 dollarë për një udhëtim shtatëditor.
Anijet turistike pritet të sjellin në Kubë miliona dollarë, ndërsa më shumë se një duzinë linjash i kanë bërë të njohura planet për të kryer lundrime turistike mes dy vendeve.
Anija turistike u ankorua në qytetin e vjetër kolonial, të vizituar vetëm pak javë më parë nga presidenti amerikan. Përmirësimi i marrëdhënieve amerikano-kubane është një prej ndërmarrjeve më të spikatura të presidencës së Obama-s. Që nga lajmërimi i një afrimi historik në dhjetor të 2014-ës nga Obama dhe Raul Castro kanë pasuar një varg zhvillimesh pozitive.
Dy vendet i rivendosën marrëdhëniet diplomatike një vit më parë, ndërsa janë nënshkruar marrëveshje me interes të përbashkët, siç është ajo e fluturimeve të drejtpërdrejta. Vizita e Barack Obama-s pak kohë më parë qe një tjetër ngjarje historike, si e para e një presidenti amerikan në detyrë pas dekadash të tëra. /tesheshi.com/
