Ka mbërritur në Shqipëri edhe pjesa e dytë e muxhahidinëve iranianë, rreth 1500 vetë, pjesë e opozitës anti-regjim që ishin strehuar në Liberty Camp në Irak.
Si pjesë e marrëveshjes mes SHBA-së dhe Shqipërisë, Tirana ishte vendi i vetëm që i strehoi ata pas largimit nga Bagdadi.
Burime pranë muxhahidinëve bënë të ditur për tesheshi.com se pjesa e dytë ka mbërritur në Tiranë në fshehtësi të plotë dhe nën masa të rrepta sigurie.
Ata do të strhohen pranë fshatit Mëzez në Tiranë ku janë paguar nga organizata rreth dy pallate të ndërtuar rishtazi.
Krerët e organizatës i kanë bërë të ditur pjesëtarëve të opozitës iraniane se gjatë qëndrimit të tyre ata duhet të mbajnë uniformat dalluese të tyre: gratë shaminë e kuqe dhe burrat veshjen e gjelbërt.
Prej vitit 2012 në Shqipëri kanë mbërritur 1 mijë persona nga Liberty Camp në Irak, aty ku ndodhen prej vitesh, por qw e ndjejnë veten të pasigurtë.
Ata janë opozita më e fortë e regjimit të Teheranit që kur një grupim politik shiia erdhi në pushtet pas një revolucioni ku rrëzuan monarkinë e shahut.
“Muxhahidinët e populllit” u krijuan nga një grup ushtarakësh që kërkonin një republikë kushtetuese demokratike në vend, por ata janë vrarë e përndjekur nga qeveria iraniane.
Udhëheqësit e Rezistencës Kombëtare të Iranit janë të vendosur në Paris ku ata kanë selinë dhe çdo vit zhvillojnë një kongres kombëtar, në të cilin marrin pjesë krerë shtetesh e politikanë nga e gjithë bota.
Këshilli kombëtar i Rezistencës së Iranit është themeluar në vitin 1981 në Teheran, me iniciativën e Massoud Rajavi, lideri i Rezistencës Iraniane.
Janë pesë organizata të përfaqësuara nga NCRI, duke përfshirë Organizatën Popullore Muxhahidinët e Iranit (PMOI / MEK), grupi më i madh dhe rezistent në Iran.
Asnjë shtet europian dhe botëror nuk ka pranuar të presë opozitën e Iranit, aq më shumë tani që u hoqën sanksionet dhe ku të gjithë presin të bëjnë tregti me një treg të madh me mbi 80 milionë banorë.
Muxhahidinët kanë aktivitet politik në të gjithë Europën përveçse në Shqipëri, për arsye se rrezikojnë jetën e njerëzve të tyre.
Siç bëri të ditur një eksponent i tyre, ata i druhen shërbimit sekret iranian, i cili në Shqipëri ka struktura mjaft të forta dhe ndjek thuajse çdo veprim të muxhahidinëve.
Në krye të organizatës është Maryam Rajavi, një grua që është bashkëshortja e ish-themeluesit të lëvizjes së muxhahidinëve. /tesheshi.com/
