Kryetari i Kuvendit, Gramoz Ruçi, nuk i ka lejuar asnjë sekondë më shumë përtej 20 minutëshit që parashikon Rregullorja e Parlamentit, deputetit Sali Berisha.
“Mos më detyroni që në seancën e parë të Kuvendit të aplikoj masat që parashikon Rregullorja, ulu zoti Berisha, mos tejkalo etikën si politikan. Dhe mos gënje shumë kolegët deputetë me ato që thua”, tha Ruçi, teksa i ndërpreu fjalën ish-kryeministrit.
Pavarësisht se deputeti Flamur Noka kërkoi t´I hapej mikrofoni dhe minutat e tij t´I kalonin Berishës, Ruçi tha se një gjë të tillë nuk e lejonte Rregullorja e Parlamentit.
Kjo ishte hera e parë, në të paktën 20 vjet, që Berishës i mbyllej mikrofoni sapo mbaronte koha e përcaktuar në rregullore.
Ndoshta, kjo është edhe arsyeja pse Edi Rama zgjodhi Gramoz Ruçin për postin e kryetarit të Kuvendit, i cili sot në seancë tregoi vendosmërinë për të zbatuar me përpikmëri atë që shkruhet në dokumentin e miratuar legjislaturën e kaluar me konsensusin e palëve. /tesheshi.com/
