Zgjedhjet parlamentare të Serbisë që do të mbahen në muajin prill, të cilat parashihen të mbahen edhe në Kosovë kanë përplasur së fundmi delegacionin e Kosovës dhe të Serbisë.
Ndërsa përfaqësues të delegacionit kosovar thonë se nuk është biseduar për këtë çështje fare në takimin e fundit që u mbajt në Bruksel, përfaqësues të delegacionit serb thonë se është biseduar për këtë çështje.
Deklaratat e palëve kanë vënë shumë pikëpyetje në opinionin kosovarë, derisa anëtarë dhe ish anëtarë të Komisionit Qendror të Zgjedhjeve (KQZ) shprehin bindjen e plotë se Serbia sërish do të mbaj zgjedhjet në shtetin tonë, pasi institucionet kosovare nuk kanë fuqi të ndalojnë organizimin e tyre.
Ministrja për Dialog në qeverinë e Kosovës, Edita Tahiri, ka thënë se në takimin e fundit me palën serbe nuk është diskutuar fare për zgjedhjet serbe në Kosovë.
“Ka pasur tendenca nga pala serbe, por ne nuk kemi pranuar të bisedojmë. Ne respektojmë vetëm dy shtetësinë. Qytetarëve serbë të Republikës së Kosovës, që kanë shtetësi të dyfishtë, do t’iu mundësohet që përmes OSBE-së t’i dërgojnë votat e tyre në Serbi. Nuk ka zgjedhje të mbajtjeve serbe në Kosovë, vetëm lejim për dy shtetësi që i organizon OSBE-ja”, ka thënë Tahiri, në një prononcim dhënë për emisionin Info Magazine për Klan Kosova.
Por, deklaratë krejt tjetër ka dhënë pas përfundimit të takimit të mbrëmshëm në Bruksel, drejtor i Zyrës për Kosovën në Qeverinë e Serbisë, Marko Gjuriq, ka
Marko Gjuriq, drejtor i Zyrës për Kosovën dhe Metohinë, siç quhet në Qeverinë e Serbisë, ka thënë për Top Channel se Serbia pret organizimin e zgjedhjeve të saj edhe në Kosovë.
“Zgjedhjet parlamentare do të mbahen në territorin e Kosovës dhe ato do të mbahen mbi parimet e njëjta sikurse në vitin 2014 me praninë e OSBE-së. Vendvotimet do të jenë të hapura dhe të gjithë qytetarët që kanë të drejtë vote dhe janë në lista, do të mund ta shfrytëzojnë këtë të drejtë”, është shprehur Gjuriq.
Do të mbahet zgjedhjet serbe në Kosovë
Ish anëtari i Komisionit Qendror të Zgjedhjeve, Fadil Maloku, deklaratat e Tahirit se nuk do të lejohet mbajtja e zgjedhjeve serbe në territorin e Kosovës i quan për konsum të brendshëm dhe me qëllim të emërohet edhe një mandate në pozitën e ministers për dialog.
Ai ka thënë në emisionin Info Magazine të Klan Kosova se beson se zgjedhet serbe do të mbahen në Kosovë dhe kështu sërish do të cenohet integriteti territorial i vendit.
Duke komentuar deklaratën e Tahirit se nuk është biseduar për zgjedhjet serbe në Kosovë, ish anëtari i KQZ-së Maloku thotë se pala kosovare është dashur që të kërkojë gjithësesi të bisedohet për këtë çështje.
Ndërsa, Binak Vishaj, anëtar i Komisionit Qendror të Zgjedhjeve nga partia Aleanca për Ardhmërinë e Kosovës, poashtu ka shprehur besimin se zgjedhjet serbe do të organizohen në shtetin tone, kurse deklaratat e Tahirit për mosmbajtjen e tyre i quan lojë fjalësh.
Organizata për Siguri dhe Bashkëpunim në Europë (OSBE) përmes një njoftimi për media ka konfirmuar se do të ndërmarrë një operacion të grumbullimit të votave në Kosovë për t’iu mundësuar personave me të drejtë vote qasje në zgjedhjet parlamentare serbe të datës 24 prill 2016.
Misioni i OSBE-së thotë se është në fazën e planifikimit të detajeve operacionale dhe do të njoftojë publikun për çdo gjë.
Çuditërisht, në këtë precedent, duket sikur zyra e OSBE-së të jetë degë e qeverisë serbe e jo një organ krejt i pavarur që ka mision thjesht vëzhgimin e ecurisë së zgjedhjeve dhe përgatitjen e një raporti mbi to.
Ndryshe, Serbia me përkrahjen e OSBE-së në vitin 2014 pati hapur 10 qendra të votimit në Kosovë dhe të drejtën e votës e kanë pasur 107,958 serbë të Kosovës.
Përgatiti: Blendi Gashi – / tesheshi.com/
