Njohësi i çështjeve evropiane Avni Mazreku thotë se peticioni që ka mbërritur sot në duart e ministrit për Integrime Europiane, Bekim Çollaku e ndihmon çështjen e liberalizimit të vizave, por mbetet vetëm një segment në rrugën e Kosovës drejt liberalizmit.
“Peticioni ndihmon në sensibilizimin e çështjes”, ka deklaruar Mazreku gjatë një interviste në Klan Kosova, për emisionin “Ora e Fundit”.
Sipas analistit Mazreku, Kosova ka ende një pjesë të madhe rruge për të përshkuar deri tek liberalizimi i vizave. Sipas tij, qasja e politikanëve në këtë proces ka qenë vetëm përmes deklaratave e jo pragmatike e funksionale.
“Korrupsioni në shkallë të lartë dhe dukuritë e tjera negative janë refleksion i mungesës së vullnetit politik për t’iu qasur një reforme që e kërkon Bashkimi Evropian”, ka thënë Mazreku.
I pyetur se cila është rruga e duhur e Kosovës për në BE, ai ka thënë se “reforma në administratën publike është rrënjësore që thuhet edhe në raportet e progresit. Mungesa e një reforme të tillë ka shkaktuar edhe një prezencë të lartë të korrupsionit në institucionet shtetërore”.
“Administrata publike është përdorur për stabilizimin e militantëve partiakë. Unë nuk mendoj që ministria e Integrimit është dikasteri kryesor për integrime. Kriteret e Bashkimit Evropian janë ndërdimensionale. Liberalizmi i vizave i ka dy kritere që njihen si kritere teknokratike dhe tjetra kritere politike”, ka shpjeguar Mazreku. /tesheshi.com/
